ഉദയവും അസ്തമയവും

-------------------------------------------------
ഈ ഇളം ചൂടാര്‍ന്ന ചുവപ്പിന്റെ കോട്ടയില്‍

നിന്നാരെന്നെ വലിച്ചെടുക്കുന്നു.

ചുറ്റും തണുക്കുന്ന വെളിച്ചത്തിന്‍ 

മുന്നിലേക്കാരെന്നെ തുടച്ചെടുക്കുന്നു.
എന്റെ ചുണ്ടിലേക്കാരോ തിരുകുമീ വസ്തു 

ഞാനൂറ്റികുടിക്കവേ
അതിലൂടൊഴുകുന്നു ജീവബിന്ദു  എന്നന്തരാളങ്ങളിലേക്കു..
----------------------------------------------------------------------------
ഈ നിറമാര്‍ന്ന കിനാവില്‍ നിന്നാരെന്നെ

വിളിച്ചുണർത്തിയത്.?
ഗദ്ഗദം നിറഞ്ഞൊരെൻ മുറിവാതില്‍ക്കല്‍ 

ആരുടെ നിഴല്‍?
എന്റെ കണ്ണീരിന്‍ ഉപ്പുപിടിച്ച തലയിണയില്‍ നിന്നും
ഇരുട്ടിന്റെ കഠോരത എന്നെ ഭയപ്പെടുത്തുമ്പോള്‍
നിന്റെ വിരല്‍ സ്പര്‍ശം എന്നെ ആകാശത്തേക്ക് ഉയർത്തുന്നുവല്ലോ !
------------------------------------------------------------------------
വെളിച്ചത്തിന്റെ കൂട്ടില്‍ നിന്നാരെന്നെ ഈ ഇരുളിന്‍ കുടുസ്സിലേക്കെറിയുന്നു.
നരയാര്‍ന്നൊരെൻ  കൺകളിൽ കൂരിരുട്ടേകാൻ

മകനേ നിനക്കുമായോ?
വിറയ്ക്കുന്ന പാദങ്ങള്‍ വലിച്ചു വയ്ക്കുമ്പോൾ
തണുക്കുന്ന ശരീരത്തിന് ചൂടായി 

ചാലിട്ടൊഴുകുന്ന മൂത്രം
മൂക്കില്‍ തുളഞ്ഞു കയറും സുഗന്ധമായെന്നെ തഴുകുന്നു.
-------------------------------------------------------------------------
തണുത്ത കൂരിരുളില്‍ നിന്നെന്നെ ആരാണ് വലിച്ചെടുക്കുന്നത്?
ഇരുണ്ട രാവില്‍ നിന്നും ഇളവെയിലിന്‍ ചൂടിലേക്കായ്‌.
ഉരുകുന്ന ചിതാഗ്നിയില്‍ നിന്നുയിർത്തു ഞാൻ പൊങ്ങുമ്പോള്‍
അടിയില്‍ വേകുന്ന ചൂടൊരു തീർത്ഥമായെന്നെ പൊതിയുന്നു.
---------------------ബി ജി എന്‍ --------------------------------