പ്രണയം പ്രാണനില്‍ പുതുജീവനേകുന്ന
പതിരുകളില്ലാത്ത ജീവസത്യം സഖേ !
ഇരുളില്‍ പതിയിരുന്നൂഴം തിരയുന്ന
കമിതാവിന്‍ കണ്ണുകളല്ലതിന്‍ പിന്നിലായ് .
ഹൃദയം മുറിയുന്ന വേദന തന്നിലും പ്രിയേ
നിന്‍ മുടിയിഴ പോലും നോവാതിരിക്കുവാന്‍
കഠിനം മനസ്സിനെ മരിക്കാനയച്ചിട്ട്‌ സദയം
മംഗളം പാടും നടനാണ്‌ ഞാനിന്നും .
പതിതന്‍,പരാജിതന്‍,പ്രണയത്താലെരിയും
മമ ജന്മത്തെ വിലപിക്കാന്‍ വിടുമ്പോഴും
സഖി നിന്നെയനുവദിക്കാന്‍ കഴിയില്ല , ഇറ്റു
കണ്ണുനീര്‍പോലുമാ കവിള്‍നനച്ചീടുവാന്‍.
ഇരുള്‍ മാറി പകല്‍ വരും, വസന്തം വരും
നീ പ്രിയന്‍ തന്‍ ചാരത്തു കനവു കണ്ടുറങ്ങും
ഇരുളൊരിക്കലും മാറാത്തോരീ മനസ്സും
ശരീരവും മണ്ണിന്‍ തണുപ്പിലലിയും നാള്‍വരും .
മറക്കാന്‍ കഴിയാത്തൊരു സന്ധ്യയില്‍ നീ -
യെന്റെ ചൂര് തേടുന്നൊരു ദിനം വരും ന്യൂനം .
നിബിഡവനാന്തരതീരത്തിലന്നെവിടെയോ
മൃതിതിന്നോരെന്നുടല്‍ കൊരിത്തരിച്ചീടും .
----------------------------------ബി ജി എന്‍
No comments:
Post a Comment