ഇന്ത്യ ഒരു ജനാധിപത്യ രാജ്യമാണ്

വിധിപറയാന്‍

നാം മുന്നിലാണെന്നും .

വിധി പറയുമ്പോള്‍

നാം പക്ഷെ ഒന്ന് നോക്കും .

പരിസരത്തൊരു പെണ്ണിന്‍

മാനം കവര്‍ന്നാലവന്

നാം നല്‍കും നിയമ പരിരക്ഷ.

അയലോക്കത്തൊരു കുഞ്ഞു

ജനനേന്ദ്രിയം തകര്‍ന്നാല്‍

അവനേകും കണ്ണ് കെട്ടിയ ത്രാസ്സില്‍

പകുത്തു വച്ച നീതി.

എങ്ങാണ്ടൊരുവന്‍ വെട്ടേറ്റു വീണാല്‍

കാക്കിയുടെ മുന്നിലടിയറവ് വയ്ക്കും

കറുത്ത കോട്ടുകള്‍ വിധി വായിക്കും .

പക്ഷെ

കാവിയിലോ

പച്ചയിലോ

വെള്ളയിലോ

എന്തിന്

ചായം തേച്ച കൊടിയിലോ

വേഷം കെട്ടിയ മതകൗപീനങ്ങളിലോ

അനീതി കണ്ടാല്‍

നാം നിയമജ്ഞരാകും

വാളും

ബോംബും

തോക്കുകളുമായി

നാം തെരുവ് കത്തിക്കും .

എണ്ണം പറഞ്ഞു

ജീവനുകളെടുക്കും .

ഇന്നലെ വരെ കണ്ട പെങ്ങള്‍

കടിച്ചു കീറാനുള്ള ഉടലാകും .

കൂടെ കളിച്ചു വളര്‍ന്നവന്‍

ശത്രുവിന്റെ മുഖമാകും .

വിധി പറയുന്നവന്റെ

ശബ്ദം ഒന്നാണ് .

മുഖം പലതെങ്കിലും .

കാരണം

ഇന്ത്യ ഒരു ജനാധിപത്യ രാജ്യമാണ് .

------------------ബിജു ജി നാഥ്