പ്രണയം അതിഗൂഢം
........................................
പടരാതെ പകരാതെ ഉള്ളില്‍ ഞാനും
പരിപാലിക്കുന്നുണ്ട് നിത്യം .
ഒരുവരുമറിയാതൊരു നാളം
അണയാതെ മങ്ങാതെയെന്നുമെന്നും.
പടരുകില്‍ ആളിക്കത്തിടാനായി
അഗ്നിയൊന്നല്ലെന്റെ ഉള്ളിലല്ലോ.
പകര്‍ന്നാല്‍ ചോര്‍ന്നുപോയീടാത്ത
വിദ്യയുമല്ലെന്‍റെയാ ദീപമറിയൂ.
തനുവില്‍ തഴുകിക്കടന്നുപോകും
വിടനുടെ കണ്ണുകള്‍ അല്ലയുള്ളില്‍
ഒളിയിടങ്ങളില്‍ ചവച്ചുതുപ്പും
ലിംഗവിശപ്പുമില്ലെന്‍റെയുള്ളില്‍ .
ധനമോ മോഹന ലോഹങ്ങളോ
അകതാരിലങ്കുരിപ്പിക്കില്ല ദാഹം.
ക്ഷണികമാം ദ്വേഷവിദ്വേഷങ്ങളും
വ്യതിചലിപ്പിക്കില്ല മാനസത്തെ.
പറയാതെ അറിയാതെ പകർന്നിടുന്നു
അതിഗൂഢം നിന്നോടുള്ളാത്മരാഗം.
അറിയാതെ കാണാതെ നീ മടങ്ങും
വഴികളിൽ ഞാനെന്നെ വിതറിടുന്നു.
ഒരു നാൾനിൻ പാദത്തിൽ നനവുണർത്തും
മൃദുപുഷ്പമല്ലതെൻ ഹൃദയമാകും.
അതിലൂടെ നീയന്നറിഞ്ഞു കൊൾക
മമരാഗമോഹങ്ങൾ നിന്നിലെന്ന് .
@ബിജു ജി.നാഥ്
No comments:
Post a Comment