ദാമ്പത്യം

ദാമ്പത്യം

------------

സമവായങ്ങളെക്കുറിച്ച് നമുക്ക് സംസാരിക്കാം .

ജീവിതത്തിന്റെ ,തിരശ്ചീനവും

തികച്ചും വരണ്ടതുമായ പാതയില്‍

ഒരുമിച്ചു സഞ്ചരിക്കുന്നതിനെക്കുറിച്ചും,

അഭിനയങ്ങളും

ഒത്തുതീര്‍പ്പുകളുമായി

അയലത്തുകാരെ കബളിപ്പിക്കുന്നതിനെക്കുറിച്ചും

നമുക്കിനി ചര്‍ച്ച ചെയ്യാം .

ശരീരത്തിന്റെ ദാഹം തീരുവോളം,

കിടക്കയില്‍ പൊരുതിത്തോല്‍ക്കുന്ന

കാടന്‍ യുദ്ധമുറകള്‍ക്ക്

ആസ്വാദനത്തിന്റെ പരിച എങ്ങനെ തീര്‍ക്കാം എന്നും,

ഒരുമിച്ചു ജീവിക്കുമ്പോഴും

നമുക്ക് പ്രിയപ്പെട്ടവര്‍ക്കൊപ്പം

മനസ്സിനിഷ്ടപ്പെട്ട രതിയെങ്ങനെ തുടരാം

എന്നും വിലയിരുത്താം .

കുഞ്ഞുങ്ങളുടെ ജീവിതത്തെ ഭാസുരമാക്കാനും,

അവരെ തന്കാലില്‍ നില്‍ക്കാന്‍ പ്രാപ്തരാക്കാനും

നമുക്കെന്തൊക്കെ ചെയ്യാമെന്നു

കൂട്ടിരുന്നാലോചിക്കാം .

നമുക്ക് നഷ്ടപ്പെടുന്നതൊന്നും

തിരികെ ലഭിക്കില്ലെന്നും,

കാലം ഒരിക്കലും കാത്തു നില്‍ക്കില്ലെന്നുമുള്ള

തിരിച്ചറിവിന്റെ സമവാക്യം

തലച്ചോറില്‍ അടയാളപ്പെടുത്തി വെയ്ക്കാം .

നഷ്ടപ്പെട്ടു പോകുന്ന യൗവ്വനവും

അന്യമാകുന്ന ജൈവവികാരങ്ങളും

ആര്‍ക്കുവേണ്ടിയോ,

എന്തിനു വേണ്ടിയോ

കുരുതികഴിക്കുന്നതിലെ അര്‍ത്ഥമില്ലായ്മയെ

തികച്ചും നിശിതമായി വിമര്‍ശിക്കാം .

നഷ്ടപ്പെടുത്തുന്ന കാലം

നഷ്ടമായി തന്നെ നില്‍ക്കുമെന്നും

വീണ്ടും കൂടണയുന്ന കാലത്തില്‍

മനസ്സിനൊപ്പം ശരീരവും,

ശരീരത്തിനൊപ്പം കാലവും

കൂട്ടില്ലാതിരിക്കുമ്പോള്‍

കെട്ടിപ്പിടിച്ചു കിടക്കാനും,

പ്രണയിക്കാനും

പോയകാലത്തിന്റെ മധുരങ്ങള്‍ ഓര്‍ത്തുവയ്ക്കാനും

എന്തെങ്കിലും ഉണ്ടാകണമെന്നു

നമുക്ക് ഉറപ്പിക്കാം .

നമുക്ക് പ്രായോഗിക ജീവിതത്തില്‍,

കാല്പനികതകള്‍ മാറ്റി വച്ച് ചിന്തിക്കുകയും

യാഥാർത്ഥ്യങ്ങളിൽ ജീവിക്കുകയും

ചെയ്യുന്നതിനെക്കുറിച്ച് ചിന്തിക്കാമിനി .

ജീവിതം ഒന്നേയുള്ളൂ എന്നത് മറക്കാതിരിക്കാം .

------ബിജു. ജി. നാഥ് വര്‍ക്കല