അവിചാരിതം

അവിചാരിതം
.......................
എനിക്ക് നിന്റെ മുലക്കണ്ണിൻ
ഇരുണ്ട വർണ്ണം പിടിച്ചു പോയി
മറച്ചു വച്ചതും മറഞ്ഞിരുന്നതും
മനസ്സിലാകെയും നിറഞ്ഞു പോയ്

ഇരുട്ടു മുറിയിൽ തനിച്ചിരുന്നു
ഞാൻ ഇമകൾ ചിമ്മാതെ നോക്കവേ
അഴിച്ചു വച്ച നിൻ കഞ്ചുകത്തിൽ
ശലഭമൊന്നു വിരുന്നു വന്നതും
ചെറുചിരിയാൽ വിരലുകൊണ്ടു നീ
തൊടുവാനാഞ്ഞതുമറിഞ്ഞു ഞാൻ

കറുപ്പു നിറമാ കൺതടങ്ങളിൽ
കടന്നു കേറിയ സങ്കടം
കരഞ്ഞു തീർക്കരുതേയിന്നത്
കണ്ടു ഞാൻ കൊതി പൂണ്ടുപോയ്.

പറയുവാനായി കഴിഞ്ഞതില്ലത്
മമഹൃദയമാണെന്നപ്പൊഴും
പറന്നുപോയാ ചുവരിലമരവേ
വിഴുങ്ങിയെന്നെയാ ഗൗളിയും.

തന്നു കളിയായിട്ടെങ്കിലും
നിൻ ഹൃദയമെനിക്കിന്നു നീ.
മടക്കുകില്ലെന്നോർത്ത് ഞാനും
കരുതി വയ്ക്കുന്നെൻ ഉള്ളിലായ്.

പഴയ കാലം തന്ന ചിന്തതൻ
പതിരു നിറഞ്ഞ സദാചാരത്തിൽ
നിറയും മനമതിനാൽ തന്നെ നിൻ
മനമിതൊട്ടുമേ അനുവദിക്കലാ!

സുഭഗേ നീ നിൻ വിരൽ മുനയെൻ
ഹൃദയമതിലൊന്നു തൊടുക വേഗം
കരുതിടട്ടെ ഞാനെന്നുമെന്നുമീ
വഷളജന്മമതിൽ ചേർന്നു പോമെന്ന്.
.... ബി.ജി.എൻ വർക്കല