നമ്മളൊന്ന്

നമ്മളൊന്ന്
......................
ചങ്കു തകർക്കുന്ന വീഡിയോകൾ ദയവായി പങ്കിടാതെന്റെ സ്നേഹിതാ .
രണ്ടു ജാതി ജനത്തെ സൃഷ്ടിക്കാൻ
ഉണ്ടതിൽ പല ചിന്തകൾ.
ഒന്നവൻ കണ്ടു രോക്ഷത്താൽ
ചോര ചിന്തുവാൻ പുറപ്പെടും.
രണ്ടവൻ കണ്ടു ഹരമേറി
ചെയ്തു കാട്ടുവാൻ ഇറങ്ങിടും.
ശക്തിയില്ലെന്റെ മാനസത്തിന്
കണ്ടു നില്ക്കുവാൻ ഈ വിധം.
എന്തിനായിവർ കൊന്നു കൂട്ടുന്നു
ദൈവരാജ്യം വരുത്തുവാൻ ?
ഇല്ല മറ്റൊരു ലോകവും ഓർക്ക ;
ഇല്ലദൃശ്യനൊരു മാമനും
ഉണ്ട് ജീവിതം പച്ചയായ് മുന്നിൽ
കൺ തുറന്നു നീ നോക്കുകിൽ .
രണ്ടു തുട്ടേകി പുഞ്ചിരിപ്പിക്കുന്ന
കേട്ടു കേൾവിയെ വാഴ്ത്തുവാൻ
ചങ്കു കീറി നീ ചോര വീഴ്ത്തുന്ന
മാനുഷൻ നിന്റെ സോദരൻ !
ഓർക്കു മാനവ , നിങ്ങൾ ചെയ്യുമീ
ക്രൂരതയ്ക്കെന്തു പേരിടും ?
വന്നു ചേരുമൊരു മാരിയിൽ , വേണ്ട
നല്ല പോലൊരു പ്രളയത്തിൽ
കണ്ടിടുന്നില്ലേ നിങ്ങൾ നിങ്ങൾ തൻ
ജീവനാരുടെ കൈയിലാ?
ഇല്ല തിരയുവാൻ അന്ന് നിങ്ങൾക്ക്
ജാതിയും മതബോധവും
ഒന്നു കാലുറച്ചു നിന്നു കഴിയുമ്പോൾ
വന്നിടുന്നു കുടിലത ചിന്തയിൽ.
മാനവാ വന്നു ചേരുക നീയി
മണ്ണിൽ ഒന്നിച്ചു കൈ കൊരുക്കുവാൻ
നമ്മളില്ലെങ്കിൽ നമ്മളാരുടെ
നന്മയ്ക്കായി പൊരുതിടും.
നന്മയെന്നു പറയുവാൻ ഉള്ളിൽ
നല്ലതേ നിങ്ങൾ പേറുക.
വേണ്ട മർത്യ നിൻ ചിന്തയിൽ വൃഥാ
മതമെന്ന വെറിയതൊട്ടുമേ!
കാത്തു നില്ക്കുന്നു ഞാനുമീ തെരുവിൽ
ഒന്നു ചേർത്തു പുൽകീടുവാൻ
വന്നു ചേരുക നിങ്ങളും പിന്നെ
നമ്മളൊന്നെന്നു ചൊന്നിടാം.
..... ബി.ജി.എൻ വർക്കല