ധീരർ

ധീരർ

.......

അവർ ആയിരങ്ങളായിരുന്നു.

ജ്വലിച്ചുയരുന്ന വിപ്ലവാവേശം അല്ല

നിലനില്പിന്റെ പ്രതിരോധമായിരുന്നു

തലച്ചോറിൽ നിറഞ്ഞു നിന്നത്.

അവർക്ക് നേതാക്കളില്ലായിരുന്നു.

അവരോരുത്തരും ഓരോ മതിലുകളായിരുന്നു.

അതിനാലാണ്

അതു കൊണ്ടു മാത്രമാണ്

ഒരു ഭീരുവിനെ

ആയുധത്തോടെ പിന്നോട്ട് നടത്തിച്ചത്.

അധികാരം കൈ കെട്ടി നിസ്സംഗം നിൽക്കേ

ലോകം നിസ്സഹായതയോടെ കണ്ടു നിൽക്കേ

ഒരു വെടിയുണ്ട കൊണ്ട് ഭയക്കാതെ

അവർ മുന്നോട്ടു നടന്നത്.

പണ്ടെങ്ങാണ്ട് കണ്ടൊരു മലയാള പടത്തിൽ

മുതലാളി, ഗുണ്ടകളെക്കൊണ്ട് അടിച്ചു നിരത്തുമ്പോൾ

ഊഴം വച്ച് സംഘങ്ങളായി മുന്നോട്ട് ചെന്ന്

തല്ലു കൊണ്ടു വീണവർ 

അവർ യാഥാർത്യമാകുകയാണ്.

ബയണറ്റുകൾക്കും

വെടിയുണ്ടകൾക്കും

ജലപീരങ്കികൾക്കും

വടിവാളുകൾക്കുമിനിയവരെ ഭയപ്പെടുത്താനാകില്ല.

കാലം മാറുകയാണ്.

ഹേ അധികാരവർഗ്ഗമേ!

മാറേണ്ടത് ഇനി നിങ്ങളാണ്.

... ബി.ജി. എൻ വർക്കല