പൂത്തു പോയില്ലേ ഞാൻ ..

പൂത്തു പോയില്ലേ ഞാൻ
.......................................
പൂത്തു പോയില്ലേ ഞാൻ
നീയെന്നെ കാത്തിരിക്കുമെന്നതോർത്ത്
പൂത്തു പോയില്ലേ ഞാൻ .
പൂക്കാതിരിക്കുന്നതെങ്ങനെ
നീയെന്റെ ഹൃത്തിൽ നിറഞ്ഞിരിക്കുമ്പോൾ
പൂത്തു പോയില്ലേ ഞാൻ .
വേനലാണെന്നറിയുന്നു എങ്കിലും
വാടാതെ നിന്നിടാം ഞാൻ
നീ വരും വീഥിയിൽ
ഏറെ പ്രതീക്ഷയിൽ
വാടാതെ നിന്നിടാം ഞാൻ
ഇതൾ കൊഴിയാതെ കാത്തിടാം ഞാൻ.
പൂത്തു പോയില്ലേ ഞാൻ .
കാറ്റടിക്കുന്നുണ്ട് ശക്തം,
ചുറ്റിലും കാട്ടുതീയെരിയുന്നുവല്ലോ.
കീഴടങ്ങീടുവാൻ മനമില്ല തെല്ലുമേ
നീ വന്നണയും വരേക്കും
പൂത്തു പോയില്ലേ ഞാൻ .
എത്ര കാലം കഴിഞ്ഞാലും
ഋതുക്കൾ എത്ര കടന്നു പോയാലും
വീഴാതെ ഞാൻ നില്ക്കും
വാഗ്ദാനമാണത്
പൂത്തു പോയില്ലേ ഞാൻ.
...... ബി.ജി.എൻ വർക്കല