അവ്യക്ത മനസ്സുകൾ

അവ്യക്ത മനസ്സുകൾ .
..................................
ഇനിയുമുണ്ടെൻ മനസ്സിന്റെ ചില്ലയിൽ,
പറന്നു പോകുവാൻ കിളികളെന്നാകിലും
പറയുവാനെനിക്കിനിയുമാകുന്നില്ല
തളർന്നു പോയൊരു മനമാണെനിക്കെന്ന്.

കടന്നുപോയൊരാ കാലത്തിലെങ്ങുമേ
കനവ് പോലൊരു ജീവിതം കണ്ടില്ല.
ഇടറിയിടറി കടന്നു ഞാൻ പോകുന്ന
ഇടവഴികളിൽ വിഷക്കല്ലുകൾ കണ്ടില്ല.

എവിടെയും ചിരിതൂകുന്ന പൂവുകൾ
വിടരും ഉദ്യാനക്കാഴ്ചകൾ എങ്കിലും
ഒരു നൊടിപോലും നിന്നതല്ലെങ്ങുമേ
ഒരു സുമം നുള്ളി വാസനിച്ചീടുവാൻ.

മിഴികൾ നല്കിയ കാഴ്‌ചകൾക്കപ്പുറം
മനമതിന്നെന്തുണ്ട് സന്തോഷമെങ്കിലും.
പലവുരുവെന്നെ കബളിപ്പിച്ചു പോയതാം
നിറങ്ങൾക്കുണ്ടാകാം ഗൂഢമാം ചിന്തകൾ.
...... ബിജു.ജി.നാഥ് വർക്കല