മേല് വിലാസം
-------------------------
സര്
എനിക്കൊരു മേല്വിലാസം വേണം.
മരിച്ച് ആറുമണിക്കൂര് കഴിഞ്ഞിരിക്കുന്നു സാര്.
എന്റെ ശരീരം പുഴുവരിക്കും മുന്പ്,
അജ്ഞാതനായി എന്നെ മറവു ചെയ്യും മുന്പ്
എനിക്കൊരു മേല്വിലാസം വേണം.
ശരിയാണ് സാര്.
ഒരുകാലത്ത് എനിക്ക് അങ്ങനൊന്ന്
ഇല്ലായിരുന്നു .
മരിച്ചു കഴിഞ്ഞാല്,
തിരിച്ചറിഞ്ഞാല് ഒരു പേര്.
ഇല്ലെങ്കില് ഒരു അജ്ഞാതന്.
ഇന്നതല്ല സാര്
ഇന്ന് മനോഹരവും തീപ്പൊരിയുള്ളതും ആയ
പേരുകള് ഉണ്ട്
മരിക്കാന് കൊതിയാകുന്നത് പോലും
അതിനാല് ആണ് .
കൊല്ലപ്പെട്ട ബി ജെ പീ ക്കാരന്
കോണ്ഗ്രസ് പ്രവര്ത്തകന്
എല് ഡി എഫ് അനുയായി
ദളിത് യുവാവ്
ന്യൂന പക്ഷക്കാരന്
എന് ഡി എഫ് കാരന്
മാവോയിസ്റ്റ്
തീവ്രവാദി
ഹിന്ദു
മുസ്ലീം
ക്രിസ്ത്യൻ......
ഹാ എന്ത് മനോഹരമായ വിലാസങ്ങള് !
ഇതൊന്നുമില്ലാതെ
ഒന്നു മരിക്കുന്നതെങ്ങനെയാണ് സാര്
ഇന്നത്തെ കാലത്ത് ?
കൊല്ലുന്നവനും
ചാവുന്നവനും
സാമൂഹ്യ വിരുദ്ധര് എന്നും
അക്രമികള് എന്നും
അജ്ഞാതര് എന്നും പേര് നല്കിയ കാലം
ഇന്നലെയുടേതാണ് സാര്.
ഇന്നവര്ക്ക് മേല്വിലാസം ഉണ്ട്
ദയവായി എനിക്കൊരു മേല്വിലാസം തരിക
ചീഞ്ഞു തുടങ്ങും മുന്പേ
മാന്യമായൊരു മേല്വിലാസം
----ബിജു.ജി.നാഥ് വര്ക്കല
No comments:
Post a Comment