ഭൂമിയും സൂര്യനും

ഭൂമിയും സൂര്യനും
.........................
പരസ്പരം കണ്ണുപൊത്തിക്കളിക്കും
രണ്ടു കള്ളങ്ങളാണവർ.
രണ്ടു പേർക്കുമറിയാം തമ്മിലിഷ്ടമാണെന്ന്
കാണാതെ കഴിയില്ലൊരു നാളുമെന്ന്
മിണ്ടാൻ കൊതിയാണെന്ന്
എങ്കിലും മുഖം വീർപ്പിച്ച്
കണ്ടിട്ടും കണ്ടില്ലെന്ന മട്ടിൽ
മിണ്ടിയിട്ടും നിന്നോടല്ലന്ന പോലെ
അഭിനയിക്കുകയാണവർ.
വെയിൽ കൊണ്ടു പൊള്ളിച്ചും
മഴ കൊണ്ട് തണുപ്പിച്ചും
മറഞ്ഞു നിന്ന് മഞ്ഞിൽ പുതപ്പിച്ചും
സൂര്യൻ അപ്രമാദിത്വം കാട്ടുന്നു.
ക്ഷമയാൽ മൗനം പൂണ്ടും
പ്രതികരണം മറച്ചു പിടിച്ചും
സർവ്വം സഹയായി ഭാവിച്ചഭൂമിയോ?
പ്രണയത്തിന്റെ ചാന്ദ്ര വെളിച്ചത്തിലൂടെ
രാത്രികളിൽ മാത്രം രൂപമാറ്റം വരുന്ന
സൂര്യനെയെന്താകും ഭൂമി വെറുക്കാത്തത്?
ഒന്നും പറയാതെ
എല്ലാം അറിഞ്ഞു കൊണ്ട്
കീഴടങ്ങിയും
അടിമയല്ലെന്ന ഭാവം പുറമേ കാട്ടിയും
ഭൂമീ , നീയെന്തിനാ സൂര്യനെയിങ്ങനെ പ്രണയിക്കുന്നു?
..... ബിജു.ജി.നാഥ് വർക്കല