മുഖംമൂടികൾ

മുഖം മൂടികൾ
......................
മുഖങ്ങൾ മാറുന്നതെളുപ്പമാണിന്ന്.
ചുരിദാറിന് പറ്റിയതൊന്ന്
സാരിക്ക് ചേരുന്ന വേറൊന്ന്
ജീൻസിലേക്ക് മാറാൻ ഇനിയൊന്ന്
പർദ്ദയിലാണെങ്കിൽ വേറിട്ടൊന്ന്
മുഖങ്ങൾക്ക് മറഞ്ഞിരിക്കാൻ മാത്രം
ഒരു മുഖമുള്ളവളുടെ മുഖമാരറിയുന്നു പാരിൽ.

നിശബ്ദമായൊരു രാത്രിയിലവൾ തൻ
മുഖമണിയാൻ കഴിയാത്ത നേരത്ത്,
പതിയെ വെളിച്ചം തെളിച്ചവൻ
പരതി നോക്കുമ്പോൾ കണ്ടവൾ തൻ
നേർമുഖം ചമയങ്ങളില്ലാതെ.

തേഞ്ഞു പോകില്ലെന്നുറപ്പുള്ളതും
കണ്ടു പിടിക്കാനെളുതല്ലെന്നതും
പരിചയാക്കി വേട്ട നടത്തവൾ തൻ,
സതിലീലാവതീ മുഖമഴിഞ്ഞുപോയതിവേഗം.

ഉത്തമനാരിയാൾ തൂലിക പടവാളാക്കി
വെട്ടിയരിഞ്ഞില്ലെത്ര ദുർന്നടത്തകൾ!
പരിഹസിച്ചില്ലെത്ര പ്രണയ നാടകങ്ങൾ
പിണങ്ങിയതെത്ര പരഗമനങ്ങളെയെങ്കിലും...
വാക്കുകൾ നഷ്ടമായാ നിശയിലവൾ
പരവശയാണ് പായുവതെങ്ങനെ
നഷ്ടമാമുടയാടയും,
മുഖാവരണങ്ങളുമില്ലാതെ വെളിച്ചത്തിലേക്ക്.
........ ബിജു.ജി.നാഥ് വർക്കല

(സ്ത്രീവിരുദ്ധത കാണും ഈ വരികളിൽ. അതിൽ ഞാൻ ഖിന്നനാണെങ്കിലും പറയേണ്ടവ പറഞ്ഞു തന്നെ വേണമല്ലോ. സദയം ക്ഷമിക്കുക സഹൃദയർ. )