ചില പതിവു കാഴ്ചകൾ

ചില പതിവു കാഴ്ചകൾ
........................................
ഒരേ ബസിന് കൈകാണിക്കുമ്പോഴും
ഒരുമിച്ചു യാത്ര ചെയ്യാൻ മടിച്ച്
ഒരേ സ്റ്റോപ്പിൽ നില്ക്കുന്നതാകാമവർ.
അതോ... യാത്ര വേണ്ടന്ന ചിന്തയോ !

വേനലും മഴയും മാറിമാറി നനച്ചിട്ടും
വേണ്ടിനി യാത്രയെന്നോർത്തിട്ടോ?
യാത്ര തുടങ്ങിയാൽ കാത്തിരിക്കാവുന്ന
അപകടമതോർത്തിട്ടുമായിരിക്കാം.

തുടങ്ങാനെളുപ്പമായ യാത്രയിൽ, കൂടെ
കരുതേണ്ടതെന്തെന്നുള്ള ചിന്തയും,
വഴിയിൽ ഉപേക്ഷിക്കേണ്ടി വന്നീടുന്ന
പൊരുളുകൾ തൻ ഭാരവും ഓർത്തിട്ടാകാം.

വെറുതെ കൈ കാട്ടുന്നുണ്ട് നിത്യവും
കയറാൻ ഒരേ വണ്ടിക്കവരെങ്കിലും.
തുടരാൻ മടിച്ചു കൊണ്ടവരെന്നുമേ
പിറകോട്ടടി വച്ചീടുന്നാ നിമിഷം തന്നെ.
...... ബിജു.ജി.നാഥ് വർക്കല