നിന്നെ വായിക്കുമ്പോഴൊക്കെ

നിന്നെ വായിക്കുമ്പോഴൊക്കെ .
................................
നിന്നെ വായിക്കുമ്പോഴൊക്കെ
സ്വാതന്ത്ര്യം കൊതിക്കുന്ന
പെണ്ണുടലിന്റെ കുതിപ്പ് ഞാനറിയാറുണ്ട്.
ഉടലിനെ മറക്കുവാനും
ഉലകത്തിൽ പറക്കുവാനും
വെമ്പൽ കൊള്ളുന്ന കിളിയെ കാണാറുണ്ട്.
പ്രണയത്തിന്റെ പച്ച ഞരമ്പു തെളിഞ്ഞ
മുലകളിലെ മാർദ്ദവം അറിയാറുണ്ട്.
ലെസ്ബിയൻ സ്നേഹത്തിന്റെ
വിരൽപ്പാടുകൾ നീലിച്ചു കിടക്കുന്ന
അടിവയർ ഓർക്കാറുണ്ട്.
വരികളിൽ ഊതനിറം നിഴലിച്ച
വ്യവസ്ഥിതികളോടുള്ള കലഹം അറിയാറുണ്ട്.
വീടിന്റെ അകത്തളങ്ങളിൽ
കടന്നു കയറുന്ന കള്ളിമുൾച്ചെടികൾ
മുള്ളിനാൽ കുത്തിനോവിക്കുന്നതും
തിരസ്കാരത്തിന്റെ ചാരം വീണ്
തഴമ്പിച്ച മനസ്സിലെ
വിഷാദ ഗസലുകളും കേൾക്കാറുണ്ട്.
നിന്നെ പ്രണയിക്കാതിരിക്കാൻ
കാരണങ്ങൾ തേടുകയാണിന്ന് ഞാൻ .
എങ്കിലും , നിന്നെ വായിക്കാതിരിക്കുന്നതെങ്ങനെ.!
..... ബിജു.ജി.നാഥ് വർക്കല