ആരും സനാഥരല്ല

ആരും സനാഥരല്ല
............................
ചുറ്റുമെല്ലാവരും ഉണ്ടുവെന്നാകിലും
ഒറ്റയായ് പോകുന്നതെന്ത് ചില ജന്മങ്ങൾ?
ഉള്ളിൽ കരഞ്ഞുകൊണ്ടെന്തു കൊണ്ടാമവർ
ചെമ്മേ ചിരിക്കുന്നതിങ്ങനെ പാരിലായി.

ഉള്ളു കാണാനുള്ളൊരുള്ളമില്ലാത്തവർ
ഉണ്ടു കൂടെയെന്നാകുമോ കാരണം.
എന്റെയെന്റെയൊന്നൊറ്റയാം ചിന്തയാൽ
കണ്ടു, കാണാത്തപോൽ പോകുന്നതാവുമോ ?

വേണ്ടതെന്തെന്ന് കേട്ടു കേട്ടെല്ലാർക്കും
വേണ്ടതെല്ലാം നല്കി സ്നേഹമുറപ്പിക്കാേർ
ഒട്ടുമറിയില്ല തങ്ങൾക്ക് വേണ്ടത്
കിട്ടുമവർ തൻ പുറംപുഞ്ചിരിയല്ലാതെ.

ഉണ്ട് ഞാനെന്ന് ചൊല്ലുവാൻ കൂടെയായ്
ഇല്ല നിഴൽ പോലും വെളിച്ചവുമില്ലെങ്കിൽ
കൂടെയുണ്ടാകുവാൻ തേടുന്നതെന്തിനായ്
മറ്റൊരാളെയീ ക്രൂരമാം വിപിനത്തിൽ മാനവാ.
..... ബിജു.ജി.നാഥ് വർക്കല