കാത്തിരിപ്പിന്റെ രാഷ്ട്രീയം

കാത്തിരിപ്പിന്റെ രാഷ്ട്രീയം
..........................................
കാത്തിരിപ്പിനൊരു  ഭ്രമണപഥമുണ്ട്.
ജീവനുള്ളതും ഇല്ലാത്തതുമായ
ചിന്തകളുടെ സൗരയൂഥത്തിലാണത്.
പ്രതീക്ഷകളുടെ ജീവസ്സുറ്റതും
ഹരിതവർണ്ണാഭവുമായ ഭൂമിയും,
അശുഭ ചിന്തകളുടെ ചൊവ്വയും,
കഷ്ടതയുടെ ശനിയും,
ഇനിയും നഷ്ടമാകാത്ത സ്വപ്നങ്ങളുടെ
വ്യാഴ മണ്ഡലവും ,
പിടികിട്ടാനിടയില്ലാത്ത പ്ലൂട്ടോയും,
ഊതിപ്പെരുപ്പിച്ച ബുധനും,
പ്രണയിനിയുടെ ചാന്ദ്രമുഖവും,
ശത്രുതകളുടെ ധൂമകേതുക്കളും
നിറഞ്ഞ സൗര മണ്ഡലം!
കാത്തിരിപ്പ് ഒരു വിസ്മയമാണ്.
അവസാനമെന്തെന്നറിയാൻ
അവസാനംവരേക്കുമറിയാത്ത
അത്ഭുതമാണ് കാത്തിരിപ്പ്.
അതിനാലാകണം ഞാനിന്നും,
ഭ്രമണപഥം നഷ്ടമായിട്ടും ഇവിടെ
സഞ്ചാരപാത തേടി അലയുന്നത്.
...... ബിജു.ജി.നാഥ് വർക്കല