നിന്റെ കിടക്കയരികില്‍
നിന്നുറക്കത്തിന്‍ താളഗതിയറിഞ്ഞു
ഞാനിരിക്കുമ്പോള്‍ പ്രിയേ,
എത്ര മോഹനം നീയെന്നറിയുന്നു .
ഉയര്‍ന്നു താഴുന്ന മാറിടങ്ങളില്‍,
പരന്ന വയറില്‍,
വസ്ത്രമൊഴുകിപ്പതിഞ്ഞു കിടക്കും
തുടകളില്‍,
മിഞ്ചികള്‍ ആലിംഗനം ചെയ്യും
കാല്‍വിരലുകളില്‍,
ചുംബനം ദാഹിച്ചൊരെന്‍ ചുണ്ടുകള്‍
കൊതിയോടെ നോക്കുന്നുണ്ട് .
എങ്കിലും നിന്‍ ചുണ്ടുകള്‍
മെല്ലെ വിടര്‍ന്നു സ്മിതം പൊഴിക്കുമ്പോള്‍,
എന്നിലെ വിശ്വാസത്തില്‍
നീ മയങ്ങുമ്പോള്‍,
ഇല്ലെനിക്കാവുകയില്ല നിന്നെ
തെല്ലൊന്നുപോലുമേ വേദനിപ്പിച്ചീടുവാന്‍ .
നിന്നെ വായിക്കുകയെന്നാല്‍
നിന്നെയറിയലാണെന്ന് ഞാനറിയുന്നു.
എങ്കിലും,നിന്നെ വായിക്കാതെ മടങ്ങുമ്പോഴും
നിന്നെ ഞാനറിയുന്നതെങ്ങനെയെന്നു
എന്റെ മനസ്സെന്നോട് ചോദിച്ചുകൊണ്ടേയിരിക്കുന്നു...
-------------ബിജു ജി നാഥ് വര്‍ക്കല
ആശംസകള്
ReplyDelete