Saturday, February 28, 2015

ചുംബനം


അധരത്തിന്‍ ഗ്രീഷ്മതാപത്താല്‍
തപിക്കുന്നെന്‍ കവില്‍ത്തടമെങ്കിലും
പ്രിയതമാമൊരിഷ്ടത്തിന്‍ ഹിമകണം
എന്‍ ഹൃദയത്തില്‍ പടരുന്നുവോ ?

പ്രിയമാണ് പ്രണയത്തിന്‍ മധു പകരും
ചുംബനമുദ്രകളെന്നുമേ മനസ്സില്‍
ശലഭങ്ങള്‍ പുഷ്പത്തിന്‍ കാതില്‍
മന്ത്രിക്കും സംഗീതം പോല്‍ ഹൃദ്യം .

അകലങ്ങളില്‍ നിന്നും, നിറയും
കണ്ണുകള്‍ കാണാതെ പരസ്പരം
പറയാതെ അറിയാതെ വിങ്ങും
ഹൃദയങ്ങള്‍ കൈമാറും സ്നേഹമാണത് .

ഒരു വെറും വാക്കിനാല്‍ നിറയ്ക്കും
ശബ്ദമല്ലത് ന്യൂനം
ഇരു ഹൃദയങ്ങള്‍ അന്യോന്യം
കൈമാറും സന്ദേശമാണത്
രതിയുടെ പരാഗം പടരാതെ
വിശുദ്ധിതന്‍ വെണ്മ പൂശും മുദ്രകള്‍.

കടമ പോല്‍ കടപ്പാട് പോല്‍
ചില നേരങ്ങളില്‍ നേരമ്പോക്ക് പോല്‍
നിറയും പുച്ഛം പോല്‍ പകരുമെങ്കിലും
ദാതാവിന്‍ ഹൃദയം സ്വീകരിക്കുക
വേനലില്‍ മഴ പോല്‍
വേഴാംബലിന്‍ മനം പോല്‍ !
----------------------ബിജു ജി നാഥ്

No comments:

Post a Comment