പഴയമുറ്റം കണ്ടു കരയാന്‍ മറന്നൊരു
കാറ്റിനെ നിങ്ങള്‍ കണ്ടിരിക്കാം
ജീവിത യാത്രയിലെപ്പോഴോ.
ചിലന്തി വലകള്‍ കൂട് കൂട്ടും
വാതില്‍ പാളികള്‍ നീക്കി നോക്കില്‍
നിങ്ങളെ കടന്നു പറന്നു പോകും
കടവാതിലുകള്‍ ഭയപ്പെടുത്തിയേക്കാം .
പൊടിയടിഞ്ഞൊരു സ്വീകരണമുറിയില്‍
ചിതറി വീണ ചില്ല് പാത്രങ്ങളില്‍
പാദമമരാതെ സൂക്ഷിച്ചില്ലേല്‍
ചോരപൊടിയും ന്യൂനമെന്നോര്‍ക്കുക .
അടുക്കളമുറിയുടെ ഇരുളില്‍ നിന്നും
പാറ്റ പഴുതാര പല്ലികള്‍ നിങ്ങളെ
കണ്ണെടുക്കാതെ നോക്കുകില്‍ ഓര്‍ക്കുക
അവയ്ക്ക് വിശക്കുന്നുണ്ടാകാം .
കിടപ്പു മുറിയിലെ ഇരുണ്ട വെളിച്ചത്തില്‍
പുതച്ചു മൂടിയുറങ്ങുന്നോരെന്നെ
വിളിച്ചുണര്‍ത്തും മുന്‍പ് നോക്കുക
ചുവരിലെ തെളിച്ചമില്ലാത്ത കണ്ണാടിയില്‍ എന്നെ .
തിളച്ച വെള്ളത്തില്‍ കൈ തൊടും പോല്‍
നടുങ്ങി മാറുമ്പോള്‍ ഓര്‍ക്കുക
നീയല്ലത് , വെറും സ്വപ്നത്തില്‍
കാണാന്‍ മറന്നൊരു ചിത്രം മാത്രമത് .
--------------------ബിജു ജി നാഥ്
No comments:
Post a Comment