ഒടുവിൽ

ഒടുവിൽ.....

.................

ഒടുവിൽ,

നീയെന്നെ മറവിയുടെ ഓലക്കീറുകൾക്കിടയിലോ

അടുക്കളക്കരിപുരണ്ട മൺചട്ടികൾക്കിടയിലോ

വിറകുപുരയിലെ ഇരുളിൽ

അഴുക്കുപുരണ്ട തുണികൾക്കിടയിലാേ

മറന്നു വച്ചേക്കും.!!

ആദ്യകാലങ്ങളിൽ ചിലപ്പോൾ

ഹൃദയം പറയുമായിരിക്കാം.

ഓർമ്മകളെ കീറക്കടലാസുകൾക്കൊപ്പം

എരിയിച്ചു കളയുന്ന കാലങ്ങളിൽ,

എത്രയും വിലപ്പെട്ടതായിരുന്നെന്ന

വെളിപ്പെടുത്തലുകളെ മറക്കുവാൻ.

ഒരിക്കലും,

മറക്കാനാവാത്തതായും

പൊറുക്കപ്പെടാനാവാത്തതായും

കരയാതിരിക്കാനാവാത്തതായും

ജീവിതത്തിൽ ചിലതുണ്ടാകും.

ചിതലരിച്ചാലും

തീയെരിഞ്ഞാലും

നനഞ്ഞു കുതിർന്നില്ലാതായാലും

കുടിച്ചു വറ്റിച്ചാലും തീരാത്തത്.

വെറുതെ.

കരയരുതെന്നു കരുതിയാലും

ഉറക്കെയുറക്കെ ചിരിക്കരുതെന്നോർത്താലും

ഓർക്കരുതിനിയെന്നു ചിന്തിച്ചാലും

മാപ്പു നല്കാൻ തോന്നിയാലും

മനസ്സ് നിറഞ്ഞ് കവിയാതെ പോകും.

എങ്കിലും

ഇനിയും ജീവിക്കണമെന്നും

ഒരിക്കലും മറക്കരുതെന്നും

എന്നെന്നും പ്രണയിക്കണമെന്നും

വേർപാടു വേദനയെന്നും

മനസ്സു മാത്രം കൊതിക്കുന്നതെന്താകും.

@ബിജു ജി.നാഥ്