പ്രണയാർബുദം

ഒരിക്കൽ നിന്റെ ചേതനയിലേക്ക്
ചോണനുറുമ്പു പോലതു നുഴഞ്ഞിറങ്ങും.
നിന്നെയാകെ മാറ്റിയത്
നിന്നിലേക്ക് പടരും.
ചിന്തകളിൽ ,
പ്രവർത്തികളിൽ...
ഉറക്കവും ഉണർവും
എല്ലാം അതു വിഴുങ്ങും.
എല്ലാം നീ മറന്നു തുടങ്ങും.
നീയും  അതും മാത്രമാകും പിന്നെയുലകിൽ.
നീ അതിനെക്കുറിച്ചു മാത്രം ചിന്തിക്കും.
അതിനെ ചുറ്റി വരുന്നതൊക്കെ
നിന്റെ സംശയക്കണ്ണുകൾക്ക് വിഷമാകും.
നിന്നിലെ ദേവൻ അതിനെ പുണരുമ്പോൾ
നിന്നിലെ അസുരൻ അതിനെ കൊന്നു തുടങ്ങും.
നിങ്ങൾ ഇരുവർക്കുമിടയിലേക്ക്
വില്ലൻമാരുണ്ടാകും.
നീയൊരു പടയാളിയാകും.
നീയൊരു കൊലയാളിയാകും...
നിന്റെയർബുദം നിന്നെയപ്പോൾ
വെറുമൊരു മാംസപിണ്ഡമാക്കിയിരിക്കും.
നീ പതിയെ മരണത്തിലേക്ക് നടന്നു തുടങ്ങും.
വേദനയുടെ ആണിക്കാൽ വലിച്ചു വച്ചു
നീ പതിയെ മരണത്തിലേക്ക് നടന്നു തുടങ്ങും.!
........... ബിജു.ജി.നാഥ് വർക്കല ......