പപ്പേട്ടന്‍

പപ്പേട്ടന്‍ എന്തിലും നന്മ കാണുന്ന ഒരു പാവം ആണ് . എന്തിനെ കുറിച്ചും പപ്പേട്ടന് വ്യക്തമായ ധാരണകള്‍ ഉണ്ട് . അത് പക്ഷെ തന്റെ ലാഭങ്ങള്‍ക്ക് വേണ്ടിയോ ലക്ഷ്യ സാധ്യത്തിനോ വേണ്ടി മാത്രമാണ് എന്നത് പപ്പേട്ടന്റെ സ്വന്തം രഹസ്യം . പപ്പേട്ടന്‍ അടുത്തിടെ ഒരു നാടകം കാണാന്‍ പോയി . നാടകം തുടങ്ങും മുന്നേ ഗ്രീന്‍ റൂമിലോക്കെ കറങ്ങിത്തിരിഞ്ഞു നടക്കവേ പപ്പേട്ടന് നാടകത്തിലെ വിദൂഷകനും ആയി പരിചയപ്പെടാന്‍ കഴിഞ്ഞു . ഹ്രസ്വമായ ആ സൗഹൃദം പപ്പേട്ടന് അടുത്ത നാടകത്തിലെ ഒരു വേഷം സമ്മാനിക്കുന്നത് വരെ എത്തി . ഒരിക്കല്‍ പപ്പേട്ടന്‍ നാടകം ആയി നടന്നു കുത്തുപാള എടുത്തത് കൊണ്ടും അഭിനയം പപ്പേട്ടന് ജീവിതമായത് കൊണ്ട് പപ്പേട്ടന്‍ സന്തോഷവാനായി . ഈ സന്തോഷം പപ്പേട്ടന്‍ പങ്കു വച്ചത് എങ്ങനെ എന്ന് നോക്കാം . പതിവ് പോലെ നാട്ടു കൂട്ടം സായാഹ്നത്തില്‍ ആല്‍മരചോട്ടില്‍ കൂടിയപ്പോള്‍ ഒരാള്‍ ചോദിച്ചു പപ്പേട്ടാ നാടകം എങ്ങനെ ഉണ്ടായിരുന്നു . പപ്പേട്ടന്‍ അരമണിക്കൂര്‍ പിന്നെ വാചാലനായി . എന്താണെന്നല്ല്ലേ . കൂട്ടരേ നിങ്ങള്‍ ആ നാടകം ഒന്ന് കാണണം . സത്യത്തില്‍ ഇത്ര നല്ലൊരു നാടകം ഞാന്‍ കണ്ടിട്ടില്ല . നാടകം തുടങ്ങുമ്പോ വിദൂഷകന്‍ വരും പിന്നെ നാടകം അയാള്‍ അങ്ങ് കയ്യിലെടുക്കുക ആണ് അക്ഷരാര്‍ത്ഥത്തില്‍ . നാടകത്തെ വിദൂഷകന്‍ നന്നായി അവതരിപ്പിച്ചു . വിദൂഷകന് വര്‍ഷങ്ങളുടെ അഭിനയ പാരമ്പര്യവും , ഭാവങ്ങളും വേഷങ്ങളും മനോഹരമായി അവതരിപ്പിക്കാനും അറിയാം . വിദൂഷകന്‍ സംഭാഷണങ്ങള്‍ തുടങ്ങിയാല്‍ പിന്നെ സംവിധായകനും രചയിതാവും എല്ലാം വെറും ശൂന്യം . വിദൂഷകന്റെ മുഖത്ത് വിടരുന്ന ഭാവങ്ങള്‍ എത്ര സുന്ദരമാണെന്നോ , വിദൂഷകന്‍ ........
ആള്‍ക്കൂട്ടം വിസ്മയഭരിതരായി നാടകം മറന്നു വിദൂഷകസ്തുതികളില്‍ മുഴുകി .
പപ്പേട്ടന്‍ നീണ്ട ഒരു ഏമ്പക്കവും വിട്ടു വീടണഞ്ഞപ്പോഴും ആള്‍ക്കൂട്ടം നാടകത്തെ കുറിച്ച് ആലോചിക്കുകയായിരുന്നു . നാടകം എന്നാല്‍ വിദൂഷക വേഷം മാത്രം ആണെന്ന് അവര്‍ ധരിച്ചു പോയാല്‍ അവരെ കുറ്റം പറയാന്‍ കഴിയില്ലല്ലോ . അവര്‍ക്കറിയില്ലല്ലോ പപ്പേട്ടന് വിദൂഷകന്‍ ഒരു നവ ജന്മം കൊടുക്കാന്‍ പോകുന്ന ലഹരിയില്‍ ആണെന്ന് .