സായാഹ്നത്തീവണ്ടി.

അത്താഴത്തിന്റെ വകകൾ
കൊത്തിയരിയുന്ന വിരലുകൾ.

കാഴ്ചകളുടെ പുതുമകൾ
കൊത്തിവലിക്കുന്ന കണ്ണുകൾ .

പത്രവാർത്തകളിൽ പ്രിയമായതെന്തോ
തേടിയലയുന്ന വായനകൾ.

മൂക്കിൻ മുന്നിൽ തൊട്ടു തൊടാത്ത
മുലകളെ തിന്നുന്ന തലച്ചോർ .

തിരക്കിന്റെ തിരക്കറിയാതെ
വാ തുറന്നുറങ്ങുന്ന വഴിവാണിഭം.

കണ്ണുകൾ കൊണ്ടു പ്രണയിച്ചു
കാൽ കഴപ്പറിയാത്ത യൗവ്വനം.

ദു:ഖത്തിന്റെ മാറാപ്പിൽ കൈയിട്ടു
ഓർമ്മകളെ തിരയുന്ന വാർദ്ധക്യം.

ഒക്കെയും കുത്തി നിറച്ചോടുകയാണ്
വാലിൽ തീപിടിച്ചൊരൊറ്റക്കണ്ണൻ
അലറിക്കൂവിക്കൊണ്ടകലേയ്ക്ക് .
..... ബിജു ജി നാഥ് വർക്കല