തളിരിനോട് പറയാനുള്ളത്

മുളപൊട്ടി വന്നോരീയുഷസ്സിൻ കരങ്ങളിൽ

ഒരു പൊൻതാരകം പോലെ നീയെങ്കിലും .

അണപൊട്ടി ഒഴുകുമീ വേദനയോടെ ഞാൻ

ഹൃദയമേ നിന്നുടെ കാവലാകാം .

കല്ലുകൾ മുള്ളുകൾ ചതിക്കുഴികൾ പിന്നെ

ഹിംസ്രമൃഗങ്ങൾ തൻ ദ്രംഷ്ടങ്ങളും .

നിറം മാറി വരുന്നൊരു സ്രിഗാലഹാസങ്ങളും

നിൻ വഴിത്താരയിൽ കൂടെയുണ്ട് .

ശിഖരങ്ങളിൽ , ഇലത്തണ്ടുകളിൽ

വേരുകളിൽ , വീശിയടിക്കും മാരുതനിൽ

പെയ്തു തോരും മഴച്ചാർത്തുകളിൽ

ഉരുകിയോലിക്കും വേനലിൽ

ഒരു മിഴി നിന്നിലേക്കാഴ്ന്നിറങ്ങുന്നുണ്ട് .

കരുതുക ഓരോ പാദങ്ങളും , വൃഥാ

കളയരുതൊരു ചലനങ്ങളും പാഴിൽ .

ഇരുളുകൾ കടമെടുക്കരുതൊരു രാവുപോലും

മുള്ളുകൾ പാദത്തെ തേടി നടക്കുന്നുണ്ടു നീളെ .

-----------------ബി ജി എൻ വർക്കല -------