സ്വപ്നാടനം

ചിറകടിച്ചു  നാം പറന്നുയരണം
നീലക്കടലാമീ ഗഗനത്തില്‍ .
പുണര്‍ന്നൊന്നായി ശയിച്ചിടാമീ 
വെണ്‍മേഘപ്പുതപ്പിലായ് .

കാറ്റിന്‍ തന്ത്രി മുറുക്കി നീയിന്നു 
തംബുരുവില്‍ ശ്രുതി പാടവേ
പേലവാംഗി നിന്‍ ചാരെ മിഴികളിലനു-
രാഗമോടെ ഞാനിരുന്നിടാം . 

ഒഴുകിവീഴുമാ ചികുരഭാരമെന്‍ മാറില്‍
ചൂടി നീ മിഴി കൊരുക്കവേ
യാത്രയാകുന്നലസമെന്‍ വിരലരുമ-
യോടെനിന്‍ മേലെയായ്.

അരുമയായി നീയരുളും മുലപ്പാല്‍
നിറുകയില്‍ തേക്കമാകവേ
കവിളിലേകുന്നു മധുരമൂറുമോരു
നനുത്ത ചുംബനപ്പൊട്ടു നീ .

രാവിന്‍ നോവകറ്റി നിദ്രതന്‍
യാമങ്ങള്‍  പിറക്കുമ്പോള്‍
കാറ്റിന്‍ കടലില്‍  യാത്രയാകുന്നു
തിങ്കള്‍ തോണിയിലിരുവര്‍ നാം .
.............................ബി ജി എന്‍
https://soundcloud.com/bgnath0/fxtuy49sa06r