പ്രതീക്ഷ

ഇളം മഞ്ഞിന്റെ തണുപ്പിനൊപ്പം

കാറ്റെനിക്ക് സമ്മാനിച്ച സുഗന്ധമേ

നിന്റെ വിടരാൻ കൊതിക്കുമീയധരങ്ങളിൽ

എന്റെ പേര് കൊത്തി വച്ചതാരാകും ...?

മഴവിൽ കൊടിപോൽ അഴകെഴുമീ

പുരികക്കൊടികൾ വളഞ്ഞു നില്ക്കെ

എള്ളിൻ പൂവൊത്ത നാസികാഗ്രം

സ്വേദ ബിന്ദുക്കൾ അലങ്കരിക്കുന്നു .

ചാറ്റൽ മഴപോലെൻ ഹൃത്തിൽ വീഴും

വാക്കിൻ ചരൽക്കല്ലുകൾ പോലും

നോക്കിൽ പുരളുന്ന സ്നേഹബാഷ്പ

നീരിൽ കുതിർന്നു ഹിമബിന്ദുവാകുന്നു .

നീ അകലുന്ന ദിക്കിലെക്കെൻ

മനവും തനുവും ഉറ്റു നോക്കവേ

തിരികെ നോക്കിയൊരു പുഞ്ചിരിതൻ

പുലർ മഞ്ഞു തരുമോയെൻ  കൂട്ടുകാരി .!

--------------ബി ജി എൻ വർക്കല ---