ഇരയുടെ (വേട്ടക്കാരൻ്റെ) മാനിഫെസ്റ്റോ

ഇരയുടെ (വേട്ടക്കാരൻ്റെ) മാനിഫെസ്റ്റോ .

............................

ഭയത്താൽ അടങ്ങിക്കിടക്കുന്നതും 

അധികാരത്തോടെ അടക്കിക്കിടത്തുന്നതും 

വേട്ടയുടെ രീതിശാസ്ത്രമാണ്. 

നീതിശാസ്ത്രമെന്ന് സംസ്കാരവേലിയും.

തല്ലിപ്പഴുപ്പിക്കാമെന്ന് വാത്സ്യായനും 

തല്ലു കൊടുക്കാമെന്ന് പടച്ചവനും .

ഇരയുടെ ഇളംമാംസത്തിന് ഇളമകൂടുന്നത്

വേട്ടക്കാരന് ഹരവുമനുവദനീയവുമത്രെ.!

ആരും തൊടാത്ത കനിയുടെ ആനന്ദം

അതാണല്ലോ ഉടമയുടെ അവകാശമെന്നും,

മാറാൻ പാടില്ലാത്ത നിയമമെന്നും ദൈവം.

ഇരകൾക്ക് വേട്ടക്കാരനധിപനെന്നല്ലോ.

ഇരകളും വേട്ടക്കാരും മാറുന്നു

ദേശങ്ങളും സംസ്കാരങ്ങളും മാറുന്നു

മതങ്ങളും ദൈവങ്ങളും മാറുന്നു.

മാറ്റമില്ലാതെ തുടരുന്നതേക നിയമത്രേ!

കാക്കയ്ക്കൊരിക്കലും കഴുകനെയോ

പന്നിക്ക് കടുവയെയോ വേട്ടയാടാനാവില്ല.

മാൻ എപ്പോഴെങ്കിലും പുലിയെ കൊല്ലുമോ

മുയൽ എന്നേലും ചെന്നായയെ തിന്നുമോ?

ഉപമകൾക്കും പ്രകൃതി നിയമങ്ങൾക്കും

ദൈവം കല്പിച്ച രീതിശാസ്ത്രങ്ങളിലനുവാദം

ഇരയെ തിരഞ്ഞെടുപ്പ് വേട്ടക്കാരനെന്നും

വേട്ടക്കാരന് കീഴടങ്ങൽ ഇരയെന്നുമാണോ?

@ബിജു.ജി.നാഥ്