വിഷവിത്ത് വിതയ്ക്കപ്പെടുമ്പോൾ...

ഒരുങ്ങുന്നുണ്ട്.
നന്നായി കിളച്ചിട്ട മണ്ണിൽ
വിത്തെറിയുന്നുണ്ട്.
വിഷബീജമെന്നറിയാതെ
പരിപാലിക്കുവാൻ
കഴുതകൾ എന്ന മുദ്രണം
ചാർത്തിയ ഞങ്ങളുണ്ട്.

വെറുപ്പിനെ വെറുത്തങ്ങൊടുവിൽ
സ്നേഹിക്കുമെന്ന
തത്വം പഠിച്ചവർ
വിത്തെറിയുന്നുണ്ട്.
അർബുദത്തിൻ വേരുകൾ
സഹ്യനിപ്പുറം പടരുമ്പോൾ,
അറിയാതെ വാഹകരായ് നിന്നീടുവാൻ
കഴുതകൾ എന്ന മുദ്രണം
ചാർത്തിയ ഞങ്ങളുണ്ട്.

കഥയറിയാതെയാട്ടം കാണും
ജനമേ, നിനക്ക് നാശം വരുന്നുണ്ട്.
ഇതു പറയുമെന്നെയും കൊന്നിടാം .
നാവറുത്തേക്കാം,
വിരലൊടിച്ചേക്കാം...
എങ്കിലും മരിക്കും വരേയും
ഞാൻ പറയുമിതുതന്നെ പിന്നെയും .

ഒരുങ്ങുന്നുണ്ട്.
നന്നായി കിളച്ചിട്ട മണ്ണിൽ
വിത്തെറിയുന്നുണ്ട്.
വിഷബീജമെന്നറിയാതെ
പരിപാലിക്കുവാൻ
കഴുതകൾ എന്ന മുദ്രണം
ചാർത്തിയ ഞങ്ങളുണ്ട്.
     ബിജു ജി നാഥ് വർക്കല