(യോ)നിയമപാലനം

ഭരണകൂടങ്ങൾ കല്പിച്ചു നല്കും
മൃദുല വ്യാകരണപുസ്തകം ജനാധിപത്യം!
അരുമയോടെ പലയിടങ്ങളിൽ നാം
പാലു പോലെ രുചിനോക്കിടുന്നുവോ?

ഒരിടത്തമ്മമാർ നഗ്നരായി തങ്ങൾ തൻ
അരുമകൾ തൻ മാനത്തെ യാജിപ്പൂ.
ഒരിടത്തൊരിരുണ്ട ജനനേന്ദ്രിയം
ഉരുളൻ കല്ലുകൾ പെറ്റു കൂട്ടുന്നുണ്ട്.

ഒരിടത്തൊരു വനനിശബ്ദത തന്നിലായി
ഒരരിപ്പയാർന്ന മാറിടം കാണുന്നു.
നിയമദണ്ഡുകൾ കയറിയിറങ്ങിയ
മൃദുലമാതൃത്വം കൽപ്പക നാട്ടിലും.

ഒരിടത്തൊരു ഗർഭപാത്രം പിടിച്ചിന്നു
ഒരറവു കത്തി തിരയുന്നൊരാൾ!
എവിടെയും കാണ്മൂ ഉദൃതങ്ങളാം
നിയമലിംഗങ്ങൾ പലരൂപമാണ്ടവർ.

കാവലാകേണ്ട കുപ്പായമണിയുവോർ
കാലകത്തിയോ നീതി നല്കുന്നത്.?
ആയിരമപരാധികൾ പോകിലുമില്ലൊ-
രു നിരപരാധിയെ,യെന്നത് സ്വപ്നമോ .!!!
......... ബിജു ജി നാഥ് വർക്കല

(ഛത്തിസ്ഗഡിലടക്കം നിയമപാലകർ കടിച്ചു കുടഞ്ഞ പെണ്ണുടലുകൾ ഓർമ്മയിൽ നിലവിളിയായി കുരുങ്ങിപ്പിടയുന്നു .നല്ല നിയമപാലകർ ഇല്ലെന്നല്ല പക്ഷേ .... വയ്യ.. 17 വയസ്സുള്ള ഒരു പെൺകുട്ടിയെ ഏഴു കൊല്ലം ...... തലയിലൊരു കടന്നൽ കൂടിളകുന്നു. )