വാക്ക്

ചക്കിലിട്ടാട്ടി പതംവരുത്തി 
കല്ലിലിട്ടലക്കി വെളുപ്പിച്ചു
 തീയിലിട്ടുരുക്കി പഴുപ്പിച്ചു
ചെത്തിയൊരുക്കി മിനുക്കി
ഉച്ചസൂര്യന്റെ മാറിൽചവിട്ടി
സ്വേദബിന്ദുവിൽ കുളിച്ചു
വച്ചുനീട്ടി മനോഹരമായൊരു
ചങ്ക് ചുവപ്പിച്ച വാക്കവൻ.

കഞ്ചുകത്തിനുള്ളിലൊളിപ്പിച്ചു
കൊണ്ടുപോയവൾ തന്വി
മന്ദഹാസം കടമെടുത്തുള്ളോര-
ല്ലികൾ വിടർത്തി മെല്ലവേ .

സായംകാലം ചുവന്നു തുടുക്കവേ
വീടിനുള്ളിലെ മൂകമാം
ശയ്യയരുകിൽ ഒട്ടുനേരം
ചിന്തയിൽ മുഴുകിയലിഞ്ഞവൾ .

ഒട്ടുനേരം കഴിയവേ തന്നുടെ
സ്നാനഗൃഹത്തിലെ ഓവു
ചാലു വഹിച്ചുപോം വാക്ക്
കണ്ടു നിന്നാലവൾ തെല്ലും
ശങ്കയേതും മിഴികളിളില്ലാതെ
---------------ബി ജി എൻ