ഇത്രമേല്‍ പ്രണയമേ നിന്നെ ഞാന്‍ പ്രണയിക്കുന്നു .
------------------------------------------
ജീവിതമെന്‍റെ ശ്വാസനാളിയില്‍ കുരുങ്ങിയടരുമ്പോഴും
ബന്ധങ്ങള്‍ എന്റെ ആത്മാവിനെപ്പോലും ഉരുക്കുമ്പോഴും
കടമകള്‍ എന്റെ വഴിത്താര വേലികെട്ടിത്തിരിക്കുമ്പോഴും
ഇത്രമേല്‍ പ്രണയമേ നിന്നെ ഞാന്‍ പ്രണയിക്കുന്നു!
യാത്രകള്‍ മുടങ്ങിപ്പോകുമീ ജീവിതപ്പാരാവാരത്തിലും
ആശകള്‍ മറവിതന്നാഴങ്ങളില്‍ അമര്‍ത്തിവച്ചീടിലും
കണ്ണുനീര്‍ മറയ്ക്കുവാന്‍ ചിരിയുടെ വര്‍ണ്ണക്കുടചൂടുകിലും
ഇത്രമേല്‍ പ്രണയമേ നിന്നെ ഞാന്‍ പ്രണയിക്കുന്നു!
വാക്കുകള്‍ തന്‍ വരികള്‍ മറന്നു പതറിപ്പോകുമ്പോഴും
വാഗ്ദാനങ്ങള്‍ ജലരേഖകള്‍ എന്നു പരിഹസിക്കുമ്പോഴും
നോട്ടങ്ങള്‍ ഒക്കെയും വെറുപ്പിന്റെ മേലാടയണിയുമ്പോഴും
ഇത്രമേല്‍ പ്രണയമേ നിന്നെ ഞാന്‍ പ്രണയിക്കുന്നു !
ഓര്‍മ്മയില്‍ സൂക്ഷിക്കുവാനടയാളം ശേഷിപ്പില്ലെങ്കിലും
വഴികാട്ടിയായ് കാലത്തിനൊന്നും നല്‍കിയിട്ടില്ലെങ്കിലും
ഹൃത്തില്‍ നീയേകിയ നോവുമധുരം നശിക്കാതിരിക്കിലും
ഇത്രമേല്‍ പ്രണയമേ നിന്നെ ഞാന്‍ പ്രണയിക്കുന്നു!
@ബിജു ജി നാഥ്
No comments:
Post a Comment