നിസ്സംഗതയുടെ മൂടുപടത്തില്‍
മറയാന്‍ വിധിക്കപ്പെട്ട വാനമേ
മഴയുടെ സംഗീതം കേട്ടിനിയെങ്കിലും
നിന്‍ സാരംഗിയില്‍ ശ്രുതിയുണരുമോ ?
കനവുകളുടെ ശവപ്പറമ്പുകളില്‍ വീണു
ഗുല്‍മോഹറുകള്‍ കരിഞ്ഞുണങ്ങുമ്പോള്‍
നനഞ്ഞു കുതിര്‍ന്ന മണ്ണില്‍ നിന്നാകാം
നെടുവീര്‍പ്പിന്റെ മഴക്കുമിളകള്‍ പൊട്ടുന്നു.
ജീവിതം പെയ്തു തോരുന്ന പകലുകള്‍,
ഉണങ്ങി വരണ്ടു പോകുന്ന രാവുകള്‍,
നീലിച്ച പാടുകളില്‍ വീണു മയങ്ങുന്ന
ചാന്ദ്രനിലാവിന്റെ ഗദ്ഗദങ്ങള്‍ മുറിയുന്നു .
നക്ഷത്രങ്ങളെ നിങ്ങള്‍ താരാട്ട് പാടിയ
സാന്ദ്രലോലമാം രാവുകളെവിടെ ?
കൊള്ളിമീനുകള്‍ ഭയം വിതറിയ നിന്റെ
ഗാഢനിദ്രകള്‍ തന്‍ താഴ്വരവകളെവിടെ !
--------------------------ബിജു ജി നാഥ്
No comments:
Post a Comment