ഓർമ്മപ്പുസ്തകത്തിൽ കുറിച്ചിടുക

ഓർമ്മപ്പുസ്തകത്തിൽ കുറിച്ചിടുക

................................................................

സ്വന്തമായ ആകാശമെന്നും

സ്വതന്ത്രമായ ചിന്തയെന്നും

നീയെന്നും അടയാളപ്പെടുത്തുന്ന

ചിലതുണ്ട് ഭൂമിമലയാളത്തിൽ .

പ്രണയമെന്ന ധാരണയിൽ

കാമമുണ്ടാകരുതെന്ന ചിന്തയിൽ

ഒരുമിച്ചിരിക്കാമെന്നും 

ഒന്നിച്ചു സഞ്ചരിക്കാമെന്നും തോന്നുമപ്പോൾ. 

നിൻ്റെ ആകാശത്തിനപ്പോൾ നീലനിറം

നിൻ്റെ കടലിന് കരിംപച്ചയും.

നിൻ്റെ മോഹങ്ങൾക്ക് വയലറ്റും

നിൻ്റെ ജീവിതത്തിന് ചുവപ്പും നിറയും.

എൻ്റെ വിരലുകൾ നിന്നെ തൊടുകയും

നീയറിയാത്തൊരു വികാരം നിറഞ്ഞ്

എൻ്റെ മാറിൽ നീ ആർത്തലച്ചു വീഴുകയും

നമുക്കിടയിൽ പ്രപഞ്ചം നിശ്ചലമാകുകയും ചെയ്യുമപ്പോൾ.

ഓർമ്മകളുടെ അരണി കടഞ്ഞ് കടഞ്ഞ്

നീയൊരുക്കുന്ന അഗ്നിയിൽ പക്ഷേ

ഉരുകി ഒലിക്കുന്ന ഹവിസ്സാകുവാൻ മാത്രം

അരികിൽ ഞാനുണ്ടാകില്ല ന്യൂനം.

കാടാണ് മനസ്സിൽ നിറയെ

കരിമ്പാറക്കെട്ടാണ് ഉള്ളിലുമെങ്കിലും

നീർച്ചോലകൾ ഉറവപൊട്ടുന്നത്

നിന്നെ മറയ്ക്കാൻ ഞാൻ ശ്രമിക്കുന്നുണ്ട്.

നിനക്ക് മഞ്ചലായെൻ മാറിടവും

നിനക്ക് സാന്ത്വനമായെൻ കരതലവും

നിനക്കാശ്വാസമായെൻ ചുംബനവും

നിനക്കായ് കരുതി വയ്ക്കും ഞാനെന്നും.

എൻ്റെ ഉഷ്ണവാതങ്ങളെയും

എന്നിലെ അഗ്നിപർവ്വതങ്ങളെയും

എൻ്റെ തപ്തനിശ്വാസക്കൊടുങ്കാറ്റുകളും

എന്നിലെ എന്നിൽ ഞാനൊളിച്ചു വയ്ക്കും.

നമുക്ക് പ്രണയിക്കാം ആവോളം

നിൻ്റെ കണ്ണുകൾ തോരും വരേയ്ക്കും

നിൻ്റെ ഹൃദയം ശാന്തമാകും വരേയ്ക്കും

നിൻ്റെ പേടികൾ മായും വരേയ്ക്കും.

@ബിജു. ജി.നാഥ്