മണൽക്കാറ്റ്

മണൽക്കാറ്റ്
.........................
ഒരു ചുംബനത്തിൻ വേരറ്റ് വീഴുന്നു
മൃതിതിന്ന കോശങ്ങൾ തൻ മൺപുറ്റുകൾ.
ഒരു വാക്കിൻ മുനയേറ്റു പിടയുന്നു
തുടിതാളം ദ്രുതമാകും ഹൃദയപ്പിടപ്പുകൾ.

കഴുവേറ്റുവാൻ ചുറ്റുമാർക്കുന്നുവോ
നിൻ്റെ കരമൊന്നു പിടിക്കുവാനായുന്നുവോ
അറിയാതെ പോയൊരെൻ വാക്കിൻ
മഴുമുനയേറ്റ് രാവിൻ്റെ നെഞ്ചു കീറുന്നുവോ?

തിരകൾപോൽ പൊങ്ങി തലതല്ലി വീഴുമീ
ഓർമ്മകൾ തൻ ഹിമശൈലമൊന്നിലായ്
മരവിച്ചു കിടക്കുന്നുണ്ടൊരു മൗനമത്
നിൻ്റെ മിഴിയിൽ കൊരുത്തിന്നുരുകീടുമോ?

പറയുവാൻ ഒരുപാട് കരുതിവച്ചെങ്കിലും
ഇടനെഞ്ചിൽ കുറുകുന്നു സങ്കടപ്രാവുകൾ.
ഒരുകാലവും പറഞ്ഞിടാനാവാതെ
പിടഞ്ഞങ്ങൊടുങ്ങുമീ ഇരുൾപ്പാതകൾ.

ഒരു ചുംബനത്തിൻ വിഷപ്പുകയാൽ
നിന്നധരം കരിനീല നിറമാർന്നുപോകവേ
വേച്ചുവേച്ചിന്നീ കാറ്റിൻ്റെ കൈകളിൽ
തോറ്റ മനുഷ്യനായ് ഞാൻ നടന്നകലുന്നു.
©️ ✍🏼@ബിജു.ജി.നാഥ്