വില്പത്രം
...................
നിന്റെ മിഴികളിലേക്ക് നോക്കുവാനാകാതെ
നിന്റെ ഹൃദയത്തിലേക്ക് നടക്കുവാനാകാതെ
നിന്റെ അരികിലേക്ക് അണയാനാകാതെ
എന്റെ ജീവൻ നിശ്ചലമാകുന്നുവെന്നോ?
നീ മുറിച്ചിട്ട ദീർഘമൗനത്തിലെങ്ങും തന്നെ
എന്റെ ആത്മസ്പന്ദനമില്ലാതിരുന്നിട്ടും
കറുത്തുറഞ്ഞ അമാവാസിയൊന്നു നിൻ
വെളുത്ത മുഖത്തിനലങ്കാരമാകുന്നുവെന്നോ!
നോക്കൂ, നിന്നെ മാത്രം ധ്യാനിച്ചിരിക്കുന്ന
വെറും വേഴാമ്പലാണ് ഞാനെന്നതോർക്കണ്ട.
ഞാനെന്നത് ആപേക്ഷികമായ മൗനവും
അനാവശ്യമായ അലങ്കാരവാക്കുമാകുന്നു.
ഇരുട്ടിന് വെളിച്ചത്തെ പുണരാനാകാത്തതും
നമുക്ക് പ്രണയിക്കാനാകാതെ പോയതും
ഒരേ നാണയത്തിനിരുപുറംപോൽ നമ്മൾ
പരസ്പരം കാണാതെ പോകുന്നതും ശരി.
മരണത്തിന്റെ തണുത്ത ചിറകുകൾ വന്ന്
ഹൃദയാന്തരാളത്തോളം സ്നേഹിക്കുമ്പോൾ
കൂടെ കൂട്ടുവാൻ ഞാൻ സൂക്ഷിക്കുന്നതാണ്
നിന്റെ പ്രണയമെന്നു വിൽപ്പത്രമെഴുതുന്നു.
....... ബി.ജി.എൻ വർക്കല
No comments:
Post a Comment