വിശ്വാസവഞ്ചന

വിശ്വാസവഞ്ചന !

................................

സൗഹൃദങ്ങളിൽ നിന്നും തെന്നിമാറി

പ്രണയമോ കാമമോയെന്ന് 

തികച്ചും വേർതിരിച്ചറിയാനാവാത്ത 

ഒരു ബിന്ദുവിൽ 

നാം ഒരുമിക്കുന്നു.

അടുപ്പത്തിൻ്റെ ആഴക്കടലിലേക്ക് 

ഒരു ഡോൾഫിനെപ്പോലെ ഞാൻ കൂപ്പുകുത്തുന്നു.

പങ്കുവയ്ക്കപ്പെടുന്ന രഹസ്യങ്ങളിൽ

വാക്കുകളുടെ ലവണരസങ്ങളിൽ

ജീവിതത്തിൻ്റെ രസക്കൂട്ട് ചേർക്കപ്പെടുന്നു.

തുറന്നു പറച്ചിലുകളുടെ ആരോഹണാവരോഹണത്തിൽ

നമ്മൾ ഒരേ കടൽത്തിരകളിൽ ലയിക്കുന്നു.

ആത്മാർത്ഥതയുടെ കപടമുഖത്തിൽ,

സ്നേഹത്തിൻ്റെ പരൽത്തിളക്കങ്ങളിൽ

സ്വന്തമെന്ന ബോധം അങ്കുരിക്കുന്നു.

അനർഹമായ പലതും കൈവിട്ടു പോകുന്നതു പോലെ

അനാവശ്യമായ ധൂർത്തുകളും സംഭവിക്കുന്നു.

ഒരു കോടക്കാറ്റിൽ

പറന്നു പോകുന്ന കരിയിലക്കടിയിൽ

നനഞ്ഞു തുടങ്ങുന്ന മണ്ണാങ്കട്ട!

ഒന്നും വേണ്ടായിരുന്നു എന്ന ചിന്ത

ബുദ്ധിയിൽ അങ്കുരിച്ചു തുടങ്ങുമ്പോഴേക്കും

കാൽക്കീഴിൽ നിന്നൊരുപാട് മണ്ണൊലിച്ചു പോയിരിക്കുന്നു.

വേദനയുടെ ആഴം,

ചുഴിയുടെ ശക്തമായ വലിച്ചു ചേർക്കൽ....

യാഥാർത്ഥ്യത്തിൻ്റെ മുഖമനാവൃതമാകുമ്പോൾ

പിഞ്ഞിക്കീറിയ ഹൃദയം മാത്രം മന്ത്രിക്കുന്നു.

"കപടലോകത്തിലാത്മാർത്ഥമായൊരു

ഹൃദയമുണ്ടായതാണെൻ്റെ പരാജയം".

........ ബി.ജി.എൻ വർക്കല