ഗന്ധമാപിനികൾ

ഗന്ധമാപിനികൾ
...........................
നിന്റെ ഏകാന്തതയുടെ സംഗീതം
ഒരു നാടോടി ഗാനം പോലെ.
അകലങ്ങളിൽ നിന്നും
അടുത്തും
അകന്നും
എന്നെ സ്പർശിച്ചു പോയ മനോജ്ഞഗീതം.
ഒരു സന്ധ്യയും
ഒരു പകലും
നിന്റെ ഗന്ധമില്ലാത്തതായി ഉണ്ടായിരുന്നില്ല.
ഇന്നു പകലുകൾ പ്രസരിപ്പിക്കുന്ന ഉഷ്ണഗന്ധത്തിലും
രാത്രിയുടെ ഇലഞ്ഞിപ്പൂമണത്തിലും
നിന്റെ വിയർപ്പു പടർന്നു കിടക്കുന്നതറിയുന്നു ഞാൻ.
നീ നനഞ്ഞൊട്ടിയൊരു കൊഴിഞ്ഞയിലപോലെ
ചില്ലയിൽ പതിഞ്ഞു കിടക്കുന്നു.
എന്റെ രസനയിൽ പടരുന്ന ഗന്ധങ്ങളിൽ
ഉരഗചൂട് നിറയുന്നു.
സർപ്പഗന്ധികൾ പോലെ നീ വിടരുന്നതറിയുന്നു.
രാത്രികൾ
പകലുകൾ
അവ എവിടെയാണിന്ന്.?
നീ എന്നെ നോക്കുന്നതറിഞ്ഞാകാം
തുടിച്ചുയരുന്ന നിന്റെ മുലക്കണ്ണുകൾ നിന്നെ തട്ടി വിളിക്കുന്നു.
എവിടെയോ പൂത്ത ഗന്ധർവ്വപ്പാലയിൽ നിന്നും
കാറ്റെനിക്ക് ഉന്മാദം നല്കുന്നു.
ഞാൻ ഒരു ഭീരുവിനെപ്പോലെ
എന്റെ പുതപ്പിനുള്ളിലേക്ക് ചുരുങ്ങുന്നു.
മദഗന്ധമില്ലാത്തൊരു പുഞ്ചിരിയോടെ
നീ നടന്നകലുമ്പോൾ
കൊഴിഞ്ഞു വീണൊരു മുടിനാര് വന്നെന്റെ
തൊണ്ടയിൽ കുരുങ്ങുന്നു.
ഒരാർത്തനാദത്തോടെ
ഞാൻ യാത്രയാകുന്നു.
... ബി.ജി.എൻ വർക്കല