ചരിത്രത്തിനു ചാരിത്ര്യഭംഗം വരുമ്പോള്‍

*ചരിത്രത്തിന് ചാരിത്രഭംഗം വരുമ്പോൾ*

പാഠപുസ്തകത്താളുകളില്‍നിന്നൂ-

 ര്‍ന്നു വീഴുന്നു 

ചരിത്രത്തില്‍ രക്തസാക്ഷികള്‍.

വിഗ്രഹങ്ങള്‍ ഉടയുന്നു 

സ്മാരകങ്ങള്‍ തകരുന്നു.

വഴിയായതും

വഴികാട്ടിയായതും

മറഞ്ഞേ പോകുന്നു.

അച്ഛന്‍ പഠിച്ച പുസ്തകത്താളിലെ

ചരിത്രം മകന്നത്ഭുതമാകുന്നു.

മണ്ണു ചാരിനിന്നവരൊക്കെയും

 പെണ്ണുകൊണ്ടുപോകും വീരന്മാരാകുന്നു .

ഒറ്റുകാരന്റെ  രക്തത്തില്‍

ദേശസ്നേഹം തിളയ്ക്കുന്നു.

അയല്‍ദേശത്തോട്  കൂറും

മാതൃരാജ്യത്തന്നവുമുണ്ട്

സമത്വം തിരഞ്ഞു വിലപിക്കുന്നു .

പിതാവിനെ കൊന്നവന്‍  പരിശുദ്ധനാകുന്നു.

പള്ളികള്‍, സ്മാരകങ്ങള്‍

ഒക്കെയും അമ്പലങ്ങളാകുന്നു.

ശാസ്ത്രത്തെ  

ചാണകവരളികളിൽ ചുട്ട് 

യാനങ്ങള്‍ പറപ്പിക്കുന്നു. 

ചരിത്രത്തിന്‍റെ ഇടനാഴികളില്‍ 

തളം കെട്ടിയ ചോരയ്ക്ക്

അവകാശികളേറെയുണ്ടാകുന്നു .

തിരുത്തിയെഴുതുവാന്‍ കൂലിവാങ്ങി   

ചരിത്രാന്വേഷകര്‍ യാത്ര ചെയ്യുന്നു. 

നിറഞ്ഞ മൗനത്തോടെ ,

തികഞ്ഞവിധേയത്തോടെ ,

പുതമുകുളങ്ങള്‍ ചരിത്രം പഠിക്കുന്നു. 

വ്യഭിചരിക്കപ്പെട്ട ചരിത്രത്തിലെ

ദുര്‍ഗന്ധം ശ്വസിക്കുന്നു.

*ബിജു. ജി.നാഥ് വർക്കല*

http://www.paperturn-view.com/world-art-cafe/world-art-cafe-february-2023-ver-01?pid=MzA307187