മിന്നുന്നതെല്ലാം പൊന്നല്ല

സൗന്ദര്യമേ നിന്റെ പിന്നിൽ മയങ്ങും
പൊയ്മുഖമാരറിയുന്നൂ പാരിൽ .
മധുവചസ്സേ നിന്റെ വിഷലിപ്തമാനസ
മറിയുവോർ അധികമില്ലുലകിൽ .

അറിയുന്നു ഞാനെന്നാൽ എളുതല്ല
പറയുവാൻ അതിരുകൾ പലതുണ്ട് മുന്നിൽ.
അകലുക നീയെന്ന പരിഹാരവാക്യത്താ-
ലനുതപിക്കട്ടിന്നു ഞാനും .

കനലെന്റെ വാക്കിലും ചിന്തയിലുമെന്നാൽ
ബന്ധപാശങ്ങളിലില്ലെന്നറിയ്ക .
അതുമതിയെന്നെയറിയുവാൻ അതിനാലേ,
അതുപറഞ്ഞകലുന്നു ഞാനും.

ഉപജാപവൃന്ദങ്ങളൊഴിയുമ്പോൾ,
തല്പത്തിൽ തളർന്നു വീഴുമ്പോൾ,
ഓർക്കുവാൻ ബാക്കിവയ്ക്കുന്നു
ഞാനെന്റെ വാക്യങ്ങളിന്നീ പകലിൽ .
--------------------------------ബിജു ജി നാഥ്