ഇഷ്ടങ്ങളുടെ പഞ്ജരത്തിൽ
സ്വപ്നങ്ങളുടെ മഞ്ചലിൽ
മയങ്ങിയുണരാൻ കൊതിക്കും
പഞ്ചവർണ്ണക്കിളിയാണ് ഞാൻ !
തുറന്നുകിടക്കും വാതായനം വിട്ടു
പരന്ന നീലാകാശം തേടാൻ
അരുതുകളില്ലെന്റെ ജീവനിലെന്നാലും
മനമത് കൊതിപ്പതില്ലൊരുനാളും .
ദിനവുമെന്നാകാശത്തുദിച്ചസ്തമിക്കും
നീയാം സൂര്യനില്ലയെങ്കിൽ
തരുലതകൾ വാടിപ്പോവും
മലർവാടിയാകുമെൻ മാനസം .
ഒരുനാളും നിന്നിലലിയാനാകില്ലെങ്കിലും
പ്രിയമോലുമൊരിഷ്ടത്താൽ ബന്ധിച്ചു
മരണമെത്തുവോളം കരുതിവയ്ക്കാൻ
കൊതിയോടെ ഞാനുണരുന്നു നിത്യം.
മണ്ണിൽ തുളഞ്ഞുകയറിപ്പോള്ളിക്കും നിൻ
സ്വേദബിന്ദുക്കള്‍ നെഞ്ചിലേറ്റ് വാങ്ങി
മതിവരുവോളം തണുത്തുറഞ്ഞൊരു
ഹിമശൈലമാകാനുണരുന്നു ഞാൻ .
----------------------------ബി ജി എന്‍
No comments:
Post a Comment