എല്ലാം ശര്യാകും
എന്നും കേട്ടിരുന്നാ വാക്ക്
ഓരോ ദശാസന്ധികളിലും
മുറതെറ്റാതെ കേട്ടു ശീലിച്ചു
എല്ലാം ശര്യാകും.
ജീവിതം കൈവിട്ടു പോയപ്പോൾ
ഉറ്റ സ്നേഹിതൻ അരികിലിരുന്നു
ചുമലിൽ തട്ടിപ്പറഞ്ഞു പോയി.
എല്ലാം ശര്യാകും.
പ്രണയം പടിയിറങ്ങിപ്പോകുമ്പോൾ
ആശ്വാസം പോലെ പറഞ്ഞിരുന്നു
ഉരുക്കാണ് നീ എന്നതറിയുക
എല്ലാം ശര്യാകും
അടിതെറ്റി വീണ് കിടന്നപ്പോൾ
അരികിലിരുന്നന്ന് നല്ല പാതിയും
കൈവിരലുകൾ മെല്ലെതലോടിപ്പറഞ്ഞു
എല്ലാം ശര്യാകും.
ഒടുവിൽ, വെള്ളപുതച്ചു കിടക്കുമ്പോൾ
വന്നണഞ്ഞു പല ദിക്കിൽ നിന്നവർ
തൊട്ടു നോക്കി തണുത്ത ദേഹിയിൽ
ഉള്ളാൽ പറഞ്ഞിരിക്കുമോ
എല്ലാം ശര്യാകുമെന്ന്!!!
@ബിജു ജി.നാഥ് വർക്കല
No comments:
Post a Comment