എല്ലാ യാത്രകളും മാറ്റി വച്ച് ഒരതിഥിയെ കാത്തിരിക്കുന്നവർ .

എല്ലാ യാത്രകളും മാറ്റി വച്ച് ഒരതിഥിയെ കാത്തിരിക്കുന്നവർ .

പല മുഖങ്ങളിൽ നിന്നും 

ഒരു മുഖം മാറിനിൽക്കുന്നതും

പല കാഴ്ചകളിൽ നിന്നും

ഒരു കാഴ്ച തെളിഞ്ഞുനിൽക്കുന്നതും

അനുഭൂതിയായ് കാണുന്നവർ

എല്ലാ യാത്രകളും മാറ്റി വച്ച്.

ആ ഒരതിഥിക്കായ് കാത്തിരിക്കും.

'നിൻ്റെ തന്തയല്ല എൻ്റെ തന്ത' എന്നുറക്കെ പറയാനും

നിൻ്റെ വിശപ്പ് എൻ്റെയും വിശപ്പെന്ന് വേദനിക്കാനും

എല്ലാവർക്കും തോന്നില്ലന്നറിയുമ്പോൾ

കല്ലെറിയുന്നവർക്ക് പുറം കാട്ടിക്കൊടുത്ത്

പുഞ്ചിരിച്ചു കൊണ്ട് കൈ വേദനിക്കുന്നോ എന്ന് തിരയാനും

എല്ലാവർക്കും കഴിയില്ലെന്നറിയുമ്പോൾ

എല്ലാ യാത്രകളും മാറ്റി വച്ച്

ആ ഒരതിഥിക്കായ് കാത്തിരിക്കും.

ഒടുവിൽ,

ഒരുപാടൊരുപാട് പറഞ്ഞും

ഒത്തിരിയൊത്തിരി കേട്ടും

സമയത്തിൻ്റെ ഇരുൾപ്പാത്തി കടക്കവേ

സമയമില്ല കാത്തു നിൽക്കാനെന്ന് പറഞ്ഞ്

ശകടമൊന്ന് ധൃതികൂട്ടുമ്പോൾ

മനസ്സില്ലാ മനസ്സോടെ യാത്ര പറഞ്ഞ് പിരിയുന്ന 

ഒരതിഥിക്കായല്ലാതെ

എല്ലാ യാത്രകളും മാറ്റി വച്ച് ആര് കാത്തിരിക്കാനാണ്.? 

@ബിജു ജി.നാഥ്