ചില കാഴ്ചകള്‍
--------------------
ജീവനില്ലാത്ത ഫലകങ്ങളില്‍
നാമെഴുതി ചേര്‍ക്കുന്നു
ജീവിതത്തിന്‍ ചലനങ്ങളെ
ആവോളമെങ്കിലും.
വേദനയും കണ്ണീരും നിറയുന്ന കാഴ്ചകള്‍ക്കു
ശാന്തിയില്ല , ശമനവും
ലോക ചലനം നിലയ്ക്കും വരേയ്ക്കുമേ.
മരണം തടയാനാകാത്ത
സങ്കടമെങ്കിലും,
ജനനമേ നിന്നെ തടുക്കുവാ-
നെളുതല്ലോ പാരില്‍ !
വളര്‍ന്നു തുടങ്ങുന്ന മുകുള-
ങ്ങള്‍ക്ക് വളമായി
തളര്‍ന്നു പോയവരുടെ ചരിത്ര-
മുണ്ട് മുന്നിലെന്നാലും .
പഠിച്ചിടില്ല നാമൊരു കാലവും
ജീവിതപാഠങ്ങള്‍ .
രമിച്ചിടും നമ്മിലെ സൗകുമാര്യങ്ങള്‍
തന്‍ നിലത്ത്
ഒരിക്കലിടറുന്ന പാദങ്ങള്‍ക്ക്
തണലായി
മഥിച്ചിടും പിന്നെ വിവശമാം
കുറ്റബോധവും.
അറിവ് തേടി നാമലയുന്നു -
ലകിലാവോളമെന്നാല്‍
അറിയുവാനാശിക്കുന്നത് വെറും
ഭോഗമോഹങ്ങള്‍
അടര്‍ത്തിയെടുക്കുന്ന ശകല
ങ്ങള്‍ ഒക്കെയും
തനിക്കു വേണ്ട സുഖങ്ങള്‍ക്ക്
മാത്രമാകുന്നുവല്ലോ .
ധരിത്രിയെ വ്യഭിചരിക്കുന്നു
നാം കേവലം
ധനസുഖത്തിനും മനസ്സുഖ-
ത്തിനും മാത്രമേ
വളര്‍ത്തിടുന്നു നാം നമുക്കൂ
വേണ്ടീടുന്ന
കളകളും, ചില പാഴ്ച്ചെടികള്‍
തന്‍ കൂട്ടവും.
--------------------
ബിജു ജി നാഥ് വര്‍ക്കല
No comments:
Post a Comment