കനല്‍പ്പെണ്ണ് (കവിതകള്‍)
സരസ്വതി . എസ്
ചിന്ത പബ്ലിക്കേഷന്‍സ്
വില : 160 രൂപ
“എന്നിട്ടുമെന്തെന്‍റെ ജീവിതാന്ത്യത്തിലെന്‍
പൊള്ളുന്ന നെറ്റിയിൽ ഉമ്മ വയ്ക്കാൻ വന്നു.
കാവ്യലോകത്തിന്‍ കെടാവിളക്കിലായൊ-
രുതുള്ളി നെയ് ഞാനുമർപ്പിച്ചു കൊള്ളട്ടെ” (മൊഴിയാഴി)
ഇന്ന് ഞാൻ വായിക്കാൻ എടുത്തത് ശ്രീമതി സരസ്വതി എസ് എഴുതിയ കവിത പുസ്തകമാണ്. “കനൽപ്പെണ്ണ്” എന്നാണ് ഈ പുസ്തകത്തിൻറെ പേര്. ഇത് പബ്ലിഷ് ചെയ്തത് ചിന്ത പബ്ലിക്കേഷൻസ് ആണ്.
മൊത്തം 56 കവിതകളാണ് ഈ പുസ്തകത്തില്‍ നമുക്ക് വായിക്കാൻ കഴിയുക. ഈ 56 കവിതകൾ രാഷ്ട്രീയപരമായും സാമൂഹ്യപരമായും ഉള്ള കാഴ്ചപ്പാടുകൾ, പ്രണയം ജീവിതം എന്നിവയുടെ അടയാളപ്പെടുത്തലുകൾ, കവിതയിലേക്കുള്ള കടന്നുവരവിന്, കവിത എങ്ങനെ തന്നിലേക്ക് ആഴ്ന്നിറങ്ങുന്നുവെന്നത്, കവിത എങ്ങനെ തന്നെ സ്വാധീനിക്കുന്നു എന്നുള്ള കണ്ടെത്തലുകള്‍, ഒരു സ്ത്രീ എന്താണെന്നുള്ള കാഴ്ചപ്പാടുകളും,സ്ത്രീയുടെ ജീവിതത്തിലെ പല ഘട്ടങ്ങളെക്കുറിച്ചുള്ള കാഴ്ചപ്പാടുകൾ തുടങ്ങിയവയുടെയൊക്കെ സമ്മിശ്ര കാഴ്ചകള്‍ ആണ് .
ഓരോന്നായി എടുത്തു നോക്കുകയാണെങ്കില്‍, രാഷ്ട്രീയപരമായ കാഴ്ചകൾ എന്ന് പറയുമ്പോൾ പ്രധാനമായും ഇടതുപക്ഷ രാഷ്ട്രീയ സ്വഭാവവും കാഴ്ചപ്പാടുകളും നിറഞ്ഞ വരികളും സൂചനകളും മറ്റും അടങ്ങിയതാണ് രാഷ്ട്രീയ കവിതകള്‍ എന്നു പരാമര്‍ശിച്ചവ. അതിൽ വിപ്ലവകാവ്യങ്ങൾ പോലെ വായിച്ചുപോകാവുന്നതുമുണ്ട്. അഭിമന്യുവിനെ പോലെയുള്ള രക്തസാക്ഷികളെക്കുറിച്ച് ഓർമിക്കുന്നുണ്ട്. വിപ്ലവം ഒടുവിൽ ഇന്നത്തെ നിലയിൽ എത്തി നിൽക്കുമ്പോൾ ഇനി എന്ത് എന്നുള്ള തോന്നലുകൾ ഉണ്ട്. ഇങ്ങനെ കുറേ കാര്യങ്ങളാണ് രാഷ്ട്രീയപരമായ കവിതകളിൽ നമുക്ക് വായിച്ചെടുക്കാൻ കഴിയുന്നത്. സാമൂഹ്യപരമായ കവിതകൾ എന്ന് പറയുമ്പോൾ ‘കൂനന്‍പറമ്പിലെ ഉറുമ്പുകൾ’എന്ന കവിതയില്‍ ജനാധിപത്യത്തിൻറെ നാലാം തൂണുകളെ പരിഹസിക്കുന്നതുപോലെ പല എഴുത്തുകളും ഇതിനകത്ത് നമുക്ക് കാണാൻ കഴിയും. ചെറുതും വലുതുമായ പല എഴുത്തുകൾ. അതിൽ നിന്നും മുന്നോട്ടു നടക്കുമ്പോൾ നമുക്ക് കവിതകളില്‍ കാണാവുന്ന മറ്റൊന്ന് സ്ത്രീകളുടെ ജീവിതം അടയാളപ്പെടുത്തലാണ്. അത് ‘നഗരത്തിലെ അമ്മയെ’ ആയ്ക്കോട്ടെ ‘അടുക്കളയിലെ പെണ്ണി'നെ ആയ്ക്കോട്ടെ, അവയെ അടയാളപ്പെടുത്തുമ്പോൾ അവയുടെ ആഴങ്ങളിലേക്കിറങ്ങി ചെന്ന് അവയെ മനസ്സിലാക്കുകയും അവ അടയാളപ്പെടുത്തുകയും ചെയ്യാനുള്ള ശ്രമങ്ങളാണവയിലൊക്കെയും നമുക്ക് കാണാൻ കഴിയുന്നത്. മറ്റൊരു വിധം കവിതകൾ എന്ന് പറയുന്നത് പ്രധാനമായും പ്രണയത്തെയാണ് അടയാളപ്പെടുത്തുന്നത്. പ്രണയം എന്ന് പറയുമ്പോൾ ഈ പ്രണയം പലപ്പോഴും പങ്കുവയ്ക്കാനുള്ളതോ അല്ലെങ്കിൽ വിതരണത്തിനുള്ളതോ ആയ ഒരു തലത്തിൽ ആണല്ലോ എഴുത്തുകളില്‍ കാണാറുള്ളത് . എന്നാല്‍ ഇവിടെ അങ്ങനെയല്ല മറിച്ച് പ്രണയത്തിൻറെ അന്തഃസത്തയെ ഉൾക്കൊണ്ടുകൊണ്ട് വൈകി വരുന്ന പ്രണയത്തെയും പ്രണയത്തെ സ്വീകരിക്കാൻ കഴിയാതെ നിൽക്കുന്ന ചിന്താഗതികളെയും, പ്രണയം എന്നാൽ ആ പ്രണയത്തിൻറെ വഴികാട്ടിയായി മുന്നിൽ നടക്കാനുള്ള തണലായി മുന്നേ നടക്കാനുള്ള ത്വരകളും, അതുപോലെ യാഥാസ്ഥിക കാഴ്ചപ്പാടുകളില്‍ ജീവിക്കുന്ന കീഴ്പ്പെട്ടു നില്ക്കാൻ ശ്രമിക്കുന്ന സ്ത്രീയുടെ ചിന്തകളും ഒക്കെയാണ് ഈ പ്രണയ കവിതകളിൽ വരുന്നത് എന്നു വായിക്കാം. ഇനി മറ്റൊരുതരം കവിതകൾ എന്ന് പറഞ്ഞവ എന്തുകൊണ്ട് അല്ലെങ്കില്‍ എങ്ങനെയാണ് കവിതകള്‍ തന്നെ സ്വാധീനിക്കുന്നതെന്നും തന്റെ ആത്മാവിനെ ഈ കവിതയിലേക്ക് എങ്ങനെയാണ് സന്നിവേശിപ്പിക്കുന്നത് എന്നും കവിതയിലൂടെ എന്താണ് തനിക്ക് പറയാനും അറിക്കുവാനും ഉള്ളതെന്ന് പറയാന്‍ ശ്രമിക്കുന്ന കുറെ കവിതകളാണ് . ഇവയൊക്കെ ചേർന്ന 56 കവിതകളാണ് ഈ പുസ്തകം നമുക്ക് സമ്മാനിക്കുന്നത്.
ഈ കവിതകളെല്ലാം തന്നെ വളരെ മഹത്തരമാണെന്നും എല്ലാം പാരായണക്ഷമതയോടുകൂടി വായിക്കാൻ കഴിയുന്നവയാണെന്നോ എല്ലാം കാമ്പും കാതലും ഉള്ളവ ആണെന്നോ ഉള്ള അഭിപ്രായം എനിക്കില്ല. എങ്കിൽക്കൂടിയും ചില കവിതകൾ ഒക്കെ വളരെ മനോഹരമാണ്. അത് നമ്മെ ചിന്തിപ്പിക്കുന്ന തലത്തില്‍ ഉപയോഗിക്കാൻ കവിക്ക് കഴിഞ്ഞിട്ടുമുണ്ട്. എന്നാൽ മറ്റുള്ള കവിതകൾക്കൊപ്പം വച്ചുനോക്കുമ്പോൾ എല്ലാം ഈ പറഞ്ഞ തലത്തില്‍ എത്തിയിട്ടില്ല എന്നുള്ളതുകൊണ്ട് മാത്രം ഈ പുസ്തകം ഉത്തമമായ ഒരു വളരെ മനോഹരമായ ഒരു സംഗതിയായി എടുത്തു പറഞ്ഞു കൊണ്ട് അവസാനിപ്പിക്കാൻ കഴിയില്ല. തെറ്റുകള്‍ ഇല്ലാത്ത ഒന്നുംതന്നെ ഇല്ലല്ലോ അതുകൊണ്ട് കവിതകൾ സംവദിക്കുന്നത് ഹൃദയത്തോടു കൂടിയായതിനാല്‍ കവിതകൾ എഴുതുന്ന മനസ്സും എഴുതുന്ന ആൾ പറയാന്‍ ശ്രമിക്കുന്ന സന്ദേശങ്ങളും വായനക്കാരിലേക്ക് എങ്ങനെ എത്തിക്കാന്‍ കഴിയുന്നു, എത്രത്തോളം നിഗൂഢതകളില്ലാതെ അവയെ വായനക്കാരന് ഗ്രാഹ്യമാക്കാന്‍ കഴിയുന്നു എന്നുള്ളവ അനുസരിച്ചിരിക്കും ഓരോ കവിതയും വായനക്കാർ സ്വീകരിക്കുക. എന്തുകൊണ്ടാണ് പഴയ കാല കവിതകളും പുതിയകാല കവിതകളും തമ്മിൽ ഒരു അന്തരം നിലനില്‍ക്കുന്നു? പുതിയ കവിതകൾ എന്തുകൊണ്ടാണ് വായനക്കാരൻ ഒരു വട്ടം വായിച്ചു മറന്നു പോകുന്നതെന്നത് ചിന്തിക്കുകയാണെങ്കില്‍ ആ ഉത്തരത്തിലടങ്ങിയിരിക്കുന്ന ഒരു സംഗതിയാണ് ഞാനീ പറഞ്ഞ വായനക്കാരനോട് എഴുത്തുകാരനും പറയാനുള്ളത് എന്താണെന്ന് അവരെ പറഞ്ഞു മനസ്സിലാക്കാൻ കഴിയാതെ പോകുന്നത് എന്ന സംഗതി. ഇവിടെ സരസ്വതിയുടെ ചില കവിതകളിലും ഇത്തരം പോരായ്മകള്‍ കാണാൻ കഴിയുന്നുണ്ട്. എങ്കിൽക്കൂടിയും കുറെയൊക്കെ കവിതകൾ നമ്മളെ വായിക്കാന്‍ പ്രേരിപ്പിക്കുന്നതും ചിന്തിപ്പിക്കുന്നതുമാണ് എന്നത് എടുത്തു പറയാം. കവിതകളുടെ മൊത്തത്തിലുള്ള ഒരു അഭിപ്രായം പറഞ്ഞു നോക്കുകയാണെങ്കില്‍ ഒരു മോശമില്ലാത്ത വായന നമുക്ക് സമ്മാനിക്കുന്ന പുസ്തകമാണ് ഇത് എന്ന് പറയാം.
“മഴനീര്‍ക്കിളികളെ! നിങ്ങളെ
മൗനത്തിന്‍ നൊമ്പരക്കൂട്ടിലടക്കാം
മതിയെ മയക്കും കഥകൾ ചൊല്ലി
മതിയാവോളം തളച്ചിടാമല്ലോ”
ഇത് മൊഴിയുറുമി എന്ന കവിതയിലെ നാലു വരികളാണ്.
മറ്റൊന്ന്
“എന്നിലെന്നൊക്കെ മൗനങ്ങൾ പൂക്കുന്നോ
വാക്കിനാലെന്‍റെ കണ്ഠവും തേങ്ങുന്നോ
അന്നുമാത്രമെന്‍ വിരൽത്തുമ്പിലെത്തി
പൊൻ നിലാവിന്‍റെ വരികളാകുന്നു നീ.”
കാവ്യം എന്ന കവിതയിലെ ചില വരികൾ
“അറിവ് നല്ലൊരുറവയായി
ആഴ്ന്നിറങ്ങണമിവരിലും
അതിന് നമ്മിൽ സന്മനസ്സും
അലിവുമൊന്നായി ചേരണം”
അകംപൊരുള്‍ എന്ന കവിതയിലെ ചില വരികള്‍ .
ഇങ്ങനെ മൊത്തം കവിതകൾ നോക്കുമ്പോള്‍ അതിനകത്ത് ചില കവിതകളിൽ നിന്നും ചില വരികൾ മാത്രം നമ്മെ ആകർഷിക്കുകയും മറ്റുള്ളത് അതിനു മുമ്പും പിമ്പുമുള്ള വരികളൊക്കെയും നഷ്ടമാകുകയോ ആശയഭ്രംശം സംഭവിക്കുകയോ ഒക്കെ ചെയ്യുന്ന ചില സംഗതികൾ കവിതകളിൽ നമുക്ക് ദര്‍ശിക്കാന്‍ കഴിയും എന്ന ആധുനിക കവിതകളിലെ പ്രശ്നം ഇവിടെ സരസ്വതിയുടെ കവിതകളിലും നമുക്ക് കാണാൻ കഴിയും. മൊത്തത്തിൽ ഒരു ഭേദപ്പെട്ട വായനാ സന്തോഷം നൽകിയ ഈ പുസ്തകത്തിനു എല്ലാ ആശംസകളും നേരുന്നു. കൂടുതല്‍ കവിതകള്‍ ഈ തൂലികയില്‍ നിന്നും പിറക്കട്ടെ എന്നും , മലയാള കവിതാ സാഹിത്യ മേഖലയില്‍ അറിയപ്പെടുന്ന ഒരാള്‍ ആകാന്‍ കഴിയട്ടെ എന്നും ആഗ്രഹിക്കുന്നു. സർക്കാര്‍ ജോലിയില്‍ നിന്നും വിരമിച്ച, സംസ്കൃത ഭാഷയില്‍ പ്രാവീണ്യമുള്ള കവയിത്രിക്ക് മലയാളകവിതയില്‍ ഒരുപാട് സമ്മാനിക്കാന്‍ കഴിയുക തന്നെ ചെയ്യും എന്നതില്‍ സംശയമില്ല. ഇത് സരസ്വതിയുടെ രണ്ടാമത്തെ കവിത പുസ്തകം ആണ്. എണ്ണം വര്‍ദ്ധിക്കുന്നതിനനുസരിച്ച് മേന്മയും വര്‍ദ്ധിക്കും എന്ന ശുഭപ്രതീക്ഷയോടെ ബി.ജി.എന്‍ വര്‍ക്കല
No comments:
Post a Comment