ശവമഞ്ചം
..................
എന്റെയെന്നുള്ളതൊന്നുമില്ലാത്ത ലോകത്തില്‍
എൻ്റെയെന്നോർത്ത് ഞാനെന്തു തിരയുന്നിഹ!
കണ്ണുകള്‍ എന്നെ വഞ്ചിക്കുന്നതല്ലെങ്കില്‍ ഈ-
കാഴ്ചകള്‍ എങ്ങനെ എന്നിലേക്കെത്തുന്നു? .
ഞാനലഞ്ഞ വഴികളില്‍ എങ്ങുമേ കണ്ടതില്ല
എന്നെ പ്രതീക്ഷിച്ചൊരു ജീവനുമിതുവരെ.
ഞാന്‍ തിരഞ്ഞൊരു കൂട്ടിലും കണ്ടീല
‘എന്റെ’ എന്നൊരു പേരും വിലാസവും.
ഞാനണിഞ്ഞൊരുരുടയാടകള്‍ കാണ്‍കിലെന്നില്‍
പാകമല്ല, ചേരും നിറവുമാര്‍ന്നിരുന്നില്ല.
ഞാന്‍ കഴിച്ചൊരന്നത്തിലെങ്ങുമേ കുറിച്ചിരുന്നി-
ല്ലെൻ്റെ നാമമോ, എനിക്കുള്ളതാണെന്നോ.
എന്റെ കാഴ്ചകള്‍ വെറും മായികം വര്‍ണാഭം.
എന്റെ യാത്രകള്‍ കേവലം വ്യര്‍ത്ഥവും.
എന്തിനായി പിന്നെയും ഈ തമോഭൂമിയില്‍
എന്നെ ഞാനിങ്ങനെ ചുമക്കുന്നു കേവലം.
@ബിജു ജി. നാഥ് വര്‍ക്കല
No comments:
Post a Comment