ചില നേരങ്ങളിൽ അവൾ....
ചില നേരങ്ങളിൽ അവൾ കുസൃതിയാണ്.
എൻ്റെ വിരൽ പിടിച്ചു നടക്കും
തലയിൽ ഞോടിച്ചിരിക്കും
ദേഷ്യം പിടിപ്പിച്ചു രസിക്കും
നുള്ളി നോവിച്ചിളകി ചിരിക്കും.
ചില നേരങ്ങളിൽ അവൾ ക്രൂരയാണ് .
ഇഷ്ടമില്ലാത്തവ മാത്രം പറയും
മറ്റു പേരുകൾ പറഞ്ഞ് കരയും
നീയില്ലാതെ ഞാൻ ഇല്ലന്ന് ആണയിടും
ക്രൂര വാക്കുകൾ പറഞ്ഞ് കടന്നു പോകും.
ചില നേരങ്ങളിൽ അവൾ പാവമാണ്.
നിങ്ങളില്ലാതെ എനിക്ക് ഉറക്കമില്ലന്ന്
നിങ്ങളെ കാണാതെ എനിക്ക് വിശപ്പാറില്ലന്ന്
നിങ്ങളുടെ ശബ്ദം എനിക്കാശ്വാസമെന്ന്
നെഞ്ചു കലങ്ങി പറഞ്ഞു കരയും.
ചില നേരങ്ങളിൽ അവൾ പ്രണയിനിയാണ്.
എൻ്റെ നെഞ്ചിൽ നഖം കൊണ്ടു പോറും
എൻ്റെ താടിമീശയെ വലിച്ചു പൊട്ടിക്കും
എന്നിലെ വികാരങ്ങളെ തല്ലിക്കൊഴിക്കും
നിങ്ങളെൻ്റെ മാത്രമെന്ന് വിങ്ങിപ്പൊട്ടും.
ഇനി പറയൂ എനിക്ക് കവിത വഴങ്ങില്ലെന്ന് . എനിക്ക് പ്രണയം വഴങ്ങില്ലെന്ന് .
എനിക്ക് മനുഷ്യനാകാനാവില്ലെന്ന് .
അതാകും ഞാനെന്നുമിങ്ങനെ....
@ ബിജു ജി. നാഥ്
No comments:
Post a Comment