ഞാന്‍
ഞാന്‍ യാത്രയാവുകയാണ്..!
നിങ്ങള്‍ തന്ന ഔദാര്യങ്ങള്‍ക്ക്,
നിങ്ങളുടെ സമ്മാനങ്ങള്‍ക്ക്,
എന്റെ മരണം കൊണ്ട് ഞാന്‍
കടം വീട്ടട്ടെ.
ആഗ്രഹങ്ങളുടെ പെരുമഴയോ,
വലിയ വലിയ സ്വപ്നങ്ങളോ,
നിങ്ങള്ക്ക് ഞാന്‍ പങ്കു വച്ചില്ല.
ഒരു കൊച്ചു തൊഴില്‍ .
ഒരു ജീവിതോപാധി..!
കമ്പോളത്തില്‍ വില പറയുന്ന
ഉരുവിന്റെ വേദന മറക്കാന്‍
ഒരു കൈത്താങ്ങ്‌ .
സാമ്പത്തിക ശാസ്ത്രത്തിന്റെ
കരിഞ്ഞ മൊട്ടായിരുന്ന താതന്റെ
തളര്‍ന്ന കണ്ണില്‍ നിന്നാണ്
വാഗ്ദാനപെരുമഴ പെയ്ത
നിങ്ങളുടെ കൂടാരത്തില്‍ ഞാന്‍
അഭയം കൊതിച്ചത്.
നിങ്ങളുടെ മോഹന വര്‍ണ്ണനകളില്‍
ഞാന്‍ സ്വര്‍ഗ്ഗത്തോളം കിനാവ്‌ കണ്ടു.
ഒടുവില്‍ എന്റെ കിനാവിന്റെ ഉയര്‍ച്ചയില്‍ ,
അത്യുന്നതിയില്‍ നിങ്ങളെന്നെ
കയറ്റി വിട്ട ഏണിക്കയര്‍ മുറിച്ചു വിട്ടു.
ഈ വിഴ്ച എന്നെ ഉയര്ത്താനല്ല
എന്റെ പതനത്തിന്‍ താഴ്ചയില്‍
എന്നെ തളച്ചിടാനുള്ളതാണ്.
ഇല്ല , എനിക്ക് തോല്‍ക്കാന്‍ ആവില്ല.
നിങ്ങളെ തോല്‍പ്പിച്ചു കൊണ്ട് ,
ഞാന്‍ ജയിക്കട്ടെ..
ഈ ഒരു കുപ്പി വിഷം കൊണ്ട്
എന്റെ സിരകളെ ഞാന്‍ ഉന്മാദം
നിറഞ്ഞ മരണത്തില്‍ ലയിപ്പിക്കട്ടെ
നിങ്ങള്ക്ക് ഇനിയും ഇരകളെ കിട്ടും
ഞാന്‍ ആര്‍ക്കും ഒരിക്കലും
ഒരു പാടമാകുന്നില്ല
ഞാന്‍ ഒരു പ്രതീകമേ അല്ല .
----------------ബി ജി എന്‍
No comments:
Post a Comment