നിൻ്റെ അതിരുകൾ

നിൻ്റെ അതിരുകൾ.

................

നോക്കൂ 

എത്ര പെട്ടെന്നാണ് നീ 

നിൻറെ ആകാശത്തിന് അതിരുകൾ വരച്ചത്.

പക്ഷികൾക്കും മേഘങ്ങൾക്കും

കാറ്റിനു പോലും 

ഇനി അതിനപ്പുറം കടക്കുക വയ്യ തന്നെ.

നിൻറെ സ്വപ്നങ്ങളുടെ ലോകം.

അതിന്, നീയൊരു ലക്ഷ്മണ രേഖ 

വരച്ചത് പോലെയാണ് .

ഒരുപക്ഷേ,

 നീ നിൻറെ ലോകം 

നിന്നിലേക്ക് ചുരുക്കുന്നത്  കൊണ്ടാകാം 

 എങ്കിലും

 പാറിപ്പറന്നു നടക്കാൻ....

വാനോളം ഉയർന്ന്,

പ്രപഞ്ചത്തോളം പരന്ന്

ഉല്ലസിക്കാൻ 

നമ്മൾ ആഗ്രഹിച്ചിരുന്നതല്ലേ?

എന്നിട്ടൊടുവിൽ 

യാത്രയുടെ പാതി വെച്ച് നീ

എന്തിനിങ്ങനെ ഒരു ലക്ഷണ രേഖ വരയ്ക്കുന്നു ?

നിനക്ക് ഞാൻ അന്യനായി തുടങ്ങിയത് കൊണ്ടാണോ

അതോ,

 എന്നെ നിനക്ക് മടുത്തു തുടങ്ങിയതോ....

പ്രതീക്ഷകളുടെ എല്ലാ കോണുകളിലും 

ചേരാതെ പോകുന്ന ഒരു സമവാക്യമായി

 മാറിയതുകൊണ്ടാണോ?.

എങ്കിലും,

നിന്റെ ലക്ഷ്മണരേഖ എനിക്ക് ഇഷ്ടമായി. 

സഞ്ചാരയോഗ്യമായ പാതയിലെല്ലാം 

ഞാൻ എൻറെ യാത്രയെ

മുന്നോട്ടു മാത്രമേ നടത്തുന്നുള്ളൂ.

പിന്നോട്ട് നടക്കാൻ 

എനിക്കും കഴിയുന്നില്ലല്ലോ...

@ ബി.ജി.എൻ വർക്കല