വെളിപാടു പുസ്തകം ഒന്നാം വാള്യം.

വെളിപാടു പുസ്തകം ഒന്നാം വാള്യം.

...........................................................

എൻ്റെ ബുദ്ധിക്കുമപ്പുറം നില്ക്കുമീ 

അല്പപ്രാണനെ തെല്ലൊന്നു നോക്കവേ.

എന്ത് കാരണം കൊണ്ടു ഞാനിപ്പഴും

കൊണ്ടു പോകുന്നീ ദേഹവും ദേഹിയും.?

കണ്ടു നില്ക്കും ജനത്തിന് രസിക്കുവാൻ

ഒന്നുമില്ലിന്ന് ബാക്കിയായെന്നിലായ്.

പ്രാണൻ പോകുന്ന നേരവും കാത്തെന്നിൽ

പാത്തിരിക്കും കൃമികളല്ലാതൊന്നുമേ !

പ്രണയം ആസ്വദിച്ചീടുവാൻ കഴിയാത്ത

ഹൃദയമൊന്നതുണ്ടീ ശരീരത്തിലായ്.

കാമമോഹിതമേറുന്ന  ചിന്തയാൽ 

ചോണനുറുമ്പ് മേഞ്ഞു നടക്കും തലച്ചോറും.

ഒന്നു ചിന്തിക്കിൽ എത്ര കുതൂഹലം! 

ഇപ്രപഞ്ചവും ഇരുകാലി മൃഗങ്ങളും.

ഒത്തു കിട്ടിയാൽ സത്തയെടുത്തിട്ട്

ചാവു നിലത്തിൽ വലിച്ചെറിഞ്ഞീടുന്നോർ!

ആത്മബന്ധമെന്നുള്ളൊരു പദത്തിൻ്റെ

ആത്മാവിനെ ചുട്ടെരിക്കുന്നവർ

ഒന്നു താങ്ങാൻ ഒട്ടൊന്നു മുതിരാതെ

മറ്റൊരാളെ തിരഞ്ഞു പിടിക്കുന്നവർ.

എത്ര തിരയുവാൻ മുതിരുകയാണെങ്കിലും

ഓർത്തുകൊള്ളുക നിങ്ങളെൻ മാളോരെ.

കിട്ടുകില്ലെവിടെയും നിങ്ങൾക്കൊരിക്കലും

മനുഷ്യനെന്ന പദത്തിൻ്റെ സത്തയെ....

@ബിജു.ജി.നാഥ് വർക്കല 05.07.2024